Health department-in fimkhurna tur an puang
Health & Family Welfare department chuan khaw luma mipui himna tura tuih tur leh tih loh turte an tarlang a, an thuchhuak chu zâwm ṭheuh turin mi tin an ngen.
HFW department chuan, khaw lumah tui in tam tur te, ni sa hnuaiah taksa khuh ṭha thuamhnaw inbel tur te, in chhung dài leh boruak lut ṭhaah awm tam tur leh protein tamna lam chi ei leh chaw ṭhing ei lo turtein mipui an ngen a; tualchhung khawchin awm dan hre turin chanchin thar en/ngaithla tur te, khawchin chungchanga thu thar ber hriat theih nan Indian Meteriological Department (IMD) website mausam.imd.gov.in/ tlawh ṭhin turtein an chah.
Khaw lum vanga sahâl emaw, khawlum kaihhnawih natna tawrh theih a ni tih tarlangin HFW chuan, "Inven ngai zual an awm a, chung mite chu nausen leh naupang, nau pai, páwn lama hna thawka eizawng, rilru leh taksa dam lohna nei, a bikin lung ṭha lo leh BP sáng an ni," an ti.
Kum upa lam leh damlo mahnia khawsate chu an hriselna dinhmun ena ni tin vil ṭhin tur a nih thu te, in chhung tidai thei tur parda, tukverh khârna leh hliap emaw hman tur a nih thu te, zanah chhuat hnaih lamah hahchawlh leh mut tur a nih thu leh taksa tih daih nan fan emaw, puan hnawm emaw hman tur a nih thute a tarlang bawk.
HEALTH DEPARTMENT THUCHAH
▶ Tuihâl hunah chauh ni lo, taksain a mamawh khawp tui a neih theih nan tui in tam tur. Kal chhuah leh zin veivahnaah tui in tur pâi tur.
▶ ORS emaw, mahni siam neembu tui, buttermilk/lassi emaw, thei tuia chi tlem pawlh in tur.
▶ Thei leh thlai hnah hring tui pâi tam chi - dawnfawh, hmazil, serthlum, grape, lakhuihthei, fanghma, lettuce leh a dangte ei tur.
▶ Thawmhnaw tháwl lam leh cotton lam chi, rawng dal lam deuh hâk tur.
▶ Ni sensa hnuaiah nihliap, lukhum leh hrûkpuan emaw khum tur.
▶ Ke lâwnga kal leh khawlaia chhuah loh tur.
▶ In chhung dai leh boruak lut ṭha takah awm tur.
▶ Nisain tukverh a em nat zual laiah puan zàr tur a ni a, boruak a luh ṭhat theih nan zanah tukverh hawn tur.
▶ Zing dàiah emaw, tlai daiah emaw páwna chhuah tum tur.
▶ Páwn lama hnathawh tur neite tan ni sat hmaa thawk turin hnathawh dan tur siam rem tur.
▶ Nisat laiin páwna chhuah lo tur, infiam loh tur.
▶ Nisa hnuaih eirawngbawl loh tur. In chhungah eirawng bàwl laiin tukverh leh ventilation hawn tur.
▶ Nisa hnuaiah zu, coffee, thingpui, thil thlum leh soda tamna lam in loh tur. Hengte hian kawchhung a tiro a, pum ná a siam thei.
▶ Protein tamna lam chi leh chaw ṭhing ei loh tur.