Zirlai excursion nei turte hun hmanpui

Sialkal Range Development Council (SRDC) huamchhunga pawl 9 leh pawl 11 topper zirlai 13, New Delhi-a kal turte pualin April 22, Inrinni khan SRDC Cell Office-ah hun hman a ni a, SRDC chairman Dr L Thangmawia, MLA in a hmanpui. MLA chuan zirlaite chu taimakna leh tumruhna thar nei turin a chah a, Rs 2,000 ṭheuh a pài nghal.

Dr L Thangmawia chuan, excursion chuan zirlaite khaw hawi tizau se a duh thu a sawi a, "Kumin HSLC leh HSSLC exam-a SRDC chhung zirna-in aṭanga distinction-a pass-te chu smartphone leh laptop pek an ni ang," a ti a, SRDC area-a zirlaite tana sak Luangmuala Paite Tribal Girls’ Hostel chu luah theih thuai a nih a beisei thu a sawi.

Zirna lam ngaihtuahtu tur ‘Hostel & Education Committee’ chu SRDC hnuaiah kum 2020 March thla khan din a nih thu sawiin MLA chuan, "He committee kaltlang hian hma tam tak lâk a ni a, SRDC chhunga zirtirtu indaih lohnate chu SRDC Fund hmangin zirtirtu rawihsak an ni ṭhin. New Delhi-a civil service coaching kal zirlai pahnih pawh Rs 2,00,000 ve vea sponsor an ni a, NDA interview hmachhawn tur zirlai pakhat hnenah cheng nuai chuang pek a ni tawh bawk," a ti.

MLA chuan zirlai thiamthei, chhungkaw harsa zirlai 40 chuang hnenah SRDC-in ṭanpuina a pe tawh a, technician zir mek zirlai pathum leh fashion designing zirlai pathum pawh sponsor an nih thu te, Mimbung HSS, Kawlbem HSS, Hrianghmun HS leh Vaikhawtlang HS-te pawh SRDC in cheng nuai têla a ṭanpui tawh thu te, kumin 2023 hian fai inelna SRDC area huamchhung khua leh zirna-inte tan buatsaih a nih dawn thu te, literature leh culture lama hmala turin ‘Cultural & Literature Committee’ chu SRDC hnuaiah din a nih tawh thu te, SRDC chhunga rangva inchung la nei lote chu kumin chhunga neih tir vek tura hmalak mek a nih thute a sawi bawk.

SRDC chhungah hian khaw paruk – Mimbung, Hrianghmun, Teikhang, Kawlbem, Vaikhawtlang leh Selamte a awm a, Mimbung hi SRDC Headquarters a ni.