Deputy Chief Minister-in Setlaka Aizawl tui lâkna thar tur a enfiah

Tlawng lui, Setlak lui chhuah aṭanga Aizawl khawpui chàwmna tur tui lâkna 37 MLD Water Treatment Plant siam mek chu April 22, Inrinni khan PHE department enkawltu Tawnluia, deputy chief minister-in tlawhin hna thawh dan a enfiah a; SIPMIU-in tui lakna an siam mek chu Aizawl mipui nghahfâk a nih thu a sawi.

Deputy CM hian Urban Development & Povery Alleviation (UDPA) hnuaia SIPMIU-in 'Augmentatio of Water Supply and Construction of 37 MLD Water Treatment Plant' an siam meka hna thawh dante hmun hrang hrangah a enfiah a; MLA Zothantluanga, Planning Board member Liamsuama leh Planning secretary Lalmalsawma Pachuau ten ṭawiawmin, SIPMIU director Lalrothanga leh a thawhpuite'n an lo dawngzawng.

Tawnluia chuan, felfai taka hna thawh zel a nih theih nan theihtawp chhuah a ngaih thu sawiin, "Water Treatment Plant thar hi Aizawl mipui nghahfâk tak tak a ni. Rei lo têah Aizawl khawpuia chengte'n tui thianghlim tam zawk an dawng thei dawn a, tui harsatna chuan ziaawm lam a pan thuai dawn a ni," a ti a; mipui beisei ang taka ṭha leh chhawr tlak a nih theih nan uluk leh ṭha taka thawk zel turin SIPMIU leh contractor-te a chah.

SIPMIU Director tarlan danin, India rama a nih dan tur anga duan (standard) angin khawpuia cheng mi pakhatin ni tin tui litre 135 dawng tura tih tihhlawhtlin chu 37 MLD Water Treatment Plant tum a ni a, hei hian Babutlang, Zarkawt aṭanga Aizawl hmar lam zawng, Zokhawsang leh Sihphir Neihbawi thlengin a châwm dawn.

37 MLD Water Treatment Plant peih a ni ṭêp tawh a, Industrial Growth Centre-a Intermediate Pumping Station siam pawh peih a ni tawh. Physical work bik chu 92% zawh a ni tawh a, pipe lian diameter milimetre 711 (inches 28)-a lian phum zawh thawkhat a ni a, Vaivakawn-Hunthar Veng pênga lei tlahniam laiah erawh phum a la ni lo. Treatment Plant tharah hian a tir lamah chuan diesel khawl hmangin tui pump tum a ni.

Greater Aizawl Water Supply Phase I & II chuan ni tin tui litre nuai 34 velin Aizawl khawpui a châwm mek a, 37 MLD Water Treatment Plant zawh a niha hman a nih hunah chuan Aizawl khawpui hneh takin a châwm tura ngaih a ni.