ZMC 1st batch MBBS zir zo tharte'n Internship an tih NMC-in a phalsak

Zoram Medical College (ZMC)-a Bachelor of Medicine, Bachelor of Surgery (MBBS) zir zo hmasa berte chu National Medical Commission (NHM)-in internship tih a phalsak thu nimina sorkar thuchhuahin a tarlang. ZMC-a MBBS zir zo hlim, internship theih hun nghâk mek mi 68 an awm.

Sorkar thuchhuah tarlan danin, Health minister Dr R Lalthangliana leh NITI Aayog member Dr VK Paul te chuan April 22, 2023 khan New Delhi-ah NMC hotute dàwrin, ZMC-a MBBS zir zote'n internship an tih theih dan tur an sawipui a, NMC hotute chuan MBBS pass tharte'n internship an ṭan an remti a ni.

Vanglaini palai zawhna chhángin ZMC director Dr John Zohmingthanga chuan, ZMC-a MBBS zir zo tharte'n internship an tih NMC-in a phalsak chungchangah hian NMC aṭangin hriattirna lehkha an la dawn an rin thu a sawi a; tuna an dawn chin chu NMC Adviser leh Board hotute'n ṭawngkaa Health Minister an hrilh chu a nih thu a sawi.

ZMC Director chuan, NMC-in Zoram Medical College chu a la pawmpui (recognised) lo tih sawiin, zirlai batch hmasa, MBBS zir zawh tawhte internship ti thei loin an tangkhang rih a, recognition nghah chhunga internship an tih theih nan NMC lam hian a rawn phalsak ta tih a sawi bawk.

Tarlan tawh angin, ZMC-a MBBS zir hmasa ber, 2018 batch-te final year exam result chu April 11, 2023 khan a chhuak a, exam hmachhawntu zirlai 95 zingah 68 an pass a, pass percentage 71.57% a ni. Exam hmachhawntu zirlai 95 zinga 73 chu Mizo an ni a, 22 chu hnam dang an ni thung. Mizo zirlai 73 zinga 52 pass in, 21 an fail a, hnam dang zirlai 22 zinga 16 pass in, paruk an fail a ni.

ZMC Director sawi danin, ZMC-ah hian kum tin MBBS zir tur zirlai 100 lak theih a ni a, tunah hian zirlai 500 tling lo deuh leh zirtirtu 146 an awm mek. Zirlai mipa leh hmeichhia tan hostel a hran ve vein a awm a, hostel-ah pindan 200 chuang a awm a; mi/ chhungkua 225 awm theihna quarters a awm bawk.

Nimina sorkar thuchhuah chuan, January 9, 2023 khan NMC assessors-te'n ZMC an endik a, tlâkchham ṭhenkhat la awmte chu sorkarin a tipuitling zel tih a tarlang.