Phulpuiah property card sem a ni
Nimin khan Phulpui leh Tachhip khuaah India hmarchhaka Survey of Villages Abadi and Mapping with Improvised Technology in Village Areas (SVAMITVA) scheme hnuaia property card sem chhuahna hmasa ber Phulpui Vantlang Hall-ah buatsaih a ni a, Land Revenue & Settlement minister Lalruatkima'n a hmanpui.
Property card hi Phulpuiah 166 leh Tachhipah 254 sem a ni a, a vaiin 420 sem a ni. SVAMITVA hi sorkar laipuia Ministry of Panchayati Raj hnuaia mi a ni a, scheme hnuaiah hian drone hmangin thingtlang khuaa mihring chenna hmunte thlalak a ni. Mizorama khua 319-ah SVAMITVA kalpui tura ruahman a ni a, khua 171-ah drone hmangin thla lak ṭan a ni tawh.
SVAMITVA hnuaiah hian thlalak hmangin property card siamsak niin, card kaltlang hian mipui chu dan anga ram neitu nihna pek an ni a; ramri chungchanga buaina a tihtlem bakah, khaw hmunhma ruahman leh loan lâk kawngahte awlsamna a thlen beisei a ni.
Minister Lalruatkima chuan, property card chu LSC nen a danglam loh thu sawiin, "Property card hian dan angin ram neitu nihna mipui hnenah a pe a, mipuite'n awlsam zawkin card hmangin loan an la thei dawn. Zangnadawmna lak kawngah pawh VC pass-in a huam ve loh ram hlutna chhût tel a ni tawh ang," a ti.
Revenue department chu mipui tana ding a nih thu sawiin Lalruatkima chuan, "Awlsam zawka mipuite'n chhiah an pek theihna tur computerise online payment of taxes peih thuai a ni dawn," a ti a; National Generic Document Registration System kalpui mekah sub-registrars’ office pawh district tinah neih thuai a beisei thu a sawi bawk.