Bial ta neih deuh tur 35 kan ruat, candidate tur nghet an la ni lo - ZPM President

ZPM president Lalliansawta chuan nimin khan an party pisaa inkhawmah thu sawiin, Assembly bial fang a, ta neih deuh tur mi 35 ruatna lehkha an pe a, candidate tur nghet erawh an la nih loh thu leh a ṭul chuan thlâk theih an la nih thu a sawi.

Lalliansawta chuan, Nomination Committee chu ṭum eng emaw zat an ṭhukhawm tih sawiin, "Harsatna leh inlungrual lohna lian tham awm loin kan tih tur kan ti zel thei a, a lawmawm hle. Tun hnai maiah khan bial han fang a, han ta neih deuh tur mi 35 ruatna lehkha pek an ni a, candidate nghet erawh an la ni lo. Harsatna leh thil thleng lian tham a awm a nih chuan thlâk leh theih tura ruahmanna siam a ni," a ti.

ZPM President chuan, bial vil tura ruat chung­changah boruak neuh neuh la awm thei a nih thu sawiin, "Kan elpui party dang game-ah lut lo turin kan inbeisei tlat a ni," a ti a; lungawi lohna an nei palh a nih pawhin social media- a áng mai loin Nomination Committee-in ruahmanna a siam pawm turin an inchah tih a sawi.

ZPM president Lalliansawta chuan, Mizoramah Assembly constituency 40 a awm tih sawiin "Mi ṭha tak tak kan lo ṭhathnem ve tâk avangin kan vaiin seat kan changkim thei dawn lo a, chhungkaw buaina a thlen lohna tura invéng turin ZPM mi leh sa zawng zawng kan insáwm. Tunah hian huaisen takin ke kan pên a ni," a ti.

Vanlalhlana, MLA pawhin thu sawiin, "Bial hrang hrang viltu kan nei ṭan a, bial hrang hrangin bial viltu kan neih a ngai tawh tih ring takin a rì a, tuna bial viltu tura ruatte hi candidate ngei ngei tur an ni tihna erawh a ni lo," tiin a sawi.