Lunglei, Lawngtlai, Mamit leh Siaha District-ahte sikserh vei an la tam - Health Minister

Health & Family Welfare minister Dr R Lalthangliana chu nimin khan Hyatt Regency, New Delhi-a Asia Pacific Leaders Conclave on Malaria Elimination-ah telin khualzahawm a ni a; Lunglei, Lawngtlai, Mamit leh Siaha district-te chu sikserh vei tamna an nih thu a sawi.

Dr R Lalthangliana chuan, Mizoramin sikserh donaa hma a lak dante sawiin, "Mizoram Health department hnuaia district pakua zinga panga chu sikserh ûm bo mai thei dinhmunah an ding tawh a, chutih rualin, district pali - Lunglei, Lawngtlai, Mamit leh Siahaahte kum tin sikserh vei an la awm," a ti a; chak zawka hmasawn a nih theih nan National Vector Borne Disease Control Programme kaihhruaina hnuaiah Mizoram sorkarin chak takin hma a la mek tih a sawi.

Health Minister chuan, sikserh tamna hmun district paliah hian thosi hlo, damdawia thosi lên chiah sa sem leh IEC/BCC activity hrang hrangah tlawmngai pawlte leh kohhrante nen ṭang hoa hmalak a nih thu sawiin, "Mizoram chu sikserh vei hmu chhuak turin India rama thisen endikna rate sang ber a ni a, sub-centre awm lohna khuaah pawh sikserh vei hmuh chhuah tuma hmalak a ni ṭhin," a ti.

Conclave hi Ministry of Health & Family Welfare leh Asia Pacific Leaders’ Malaria Alliance (APLMA)-te buatsaih a ni a, Union Health minister Dr Mansukh Mandaviya-a'n a kaihruai. World Health Organisation, NITI Aayog leh Indian Council of Medical Research aiawhte leh khawvela sikserh donaa pawl lian tak tak te an tel a; Indonesia, Malaysia, Solomon Islands, Fiji, Cambodia, Sri Lanka, Nepal, Thailand leh Myanmar palaite leh India rama state ṭhenkhat minister-te'n thu an sawi.