MRB-in CSR-ah cheng vbc. 1.81 an pe; MRB dàwr turin Mizo mipui an sáwm
Mizoram Rural Bank (MRB) chairman V Jaya Chandra chuan, sorkar kum liam ta 2022-23 chhung khan corporate social responsibility (CSR) aṭangin cheng vbc. 1.81 an pek chhuah thu a sawi a, MRB dàwr hrâm hrâm turin Mizoram mipui a sáwm.
V Jaya Chandra hian nimin khan MRB pisapuiah thuthar thehdarhtute a kâwm a; CSR hmanga mipui tana thil ṭangkai tih an ngaih pawimawh ṭhin thu sawiin, "Kum 2022-23 khan CSR-ah cheng vbc. 1.81 kan pe chhuak. CSR dilna rawn lutte hi a ngaihtuahtu committee-in zir chiangin thlan a ni ṭhin. CSR pek chhuah hi kan ngai pawimawh," a ti.
MRB chu Mizoramah chauh a awm avangin an bank-a sum lutte chu Mizoram chhungah vek a kal kual thu sawiin Chandra chuan, "Kan bank-ah sum in dah a nih chuan Mizoram leh Mizo mipui tan vek a luang chhuak," a ti a; Mizo mipui tana thil ṭha tam zawk an tih theihna atan an bank dàwr turin Mizo mipui a sáwm a ni.
V Jasa Chandra chuan, Mizorama bank awm zingah kum 2022-23 chhungin loan pe chhuak hnem ber an nih thu sawiin, "Loan pek chhuahah bank lian ber kan ni. Kan bank sum che vel hi cheng vbc. 7,86.57 a ni a, March 2022 aṭanga tehin cheng vbc. 1,131.04 (16.80%)-in a ṭhang. Kum 2022-23 chhunga kan net profit chu cheng vbc. 65.19 a ni a, kum hmasa aiin 32.06%-in a pung," a ti.
MRB Chairman sawi danin, MRB hian qua-rantor leh security ngai loin loneitute tan loan Rs 1,50,000 aia tam lo leh sum-dawng tan Rs 10,00,000 aia tam lo an pe thei.
MRB hian Mizoram district khawpui leh RD block zawng zawngah branch an nei vek a, branch 102 neiin, thawktu 477 an awm a; sorkar kum kal mekah branch thar 8-9 vel hawn an tum. Mi 9,66,580-in MRB-ah account an hawng a, chung zinga 69,212 chuan loan an pûk mek a ni.