KHAWTHLIR

Candidate puan belh

ZPM party chuan Chakma Autonomous District Council (CADC) inthlanpui, May 9, 2023-a neih tura an candidate tur mi pali dang nimin khan an puang leh a, a hmaa an puan tawh mi pakua nen candidate 13 an nei dawn. ZPM candidate tur puan belhna inkhawm hi nimin khan Chawngtea ZPM Office-ah neih a ni a, ZPM Gen.Hqrs aṭanga CADC Election chairman C Lianlunga'n a puang a ni.

Thupha chawi

Samlukhai Village Council, YMA, MUP, MHIP leh zirlai pawl hruaitute chuan an khaw mi Lalfakmawia'n a vih hlum Lalrammawia h/o Lalramsiami, Bawngkawn chu an tlawh a, thuphá an chàwi bakah, ràlna Rs 58,400 an hlan. Samlukhai khawtlang hruaitute hi Bawngkawn Local Council leh YMA hruaitute'n an ṭawiawm a, Bawngkawn LC pawhin ràlna Rs 10,000 an hlàn a ni.

Kai sang lawmpui

Mizoram Departmental Officers’ Association chuan nimin khan Taxation auditorium-ah an member zinga kai sang mi 46-te lawmpuina hun an hmang. Sorkar department ṭhenkhata indaih lohna nasa lutuk avanga harsatna la awm thei turte an sawiho nghal a; Mizoram sorkar hnuaia thawk officer-te dinhmun inang tlanga kal an duh thu an tarlang.

MNF party inkhawm

MNF party chuan nimin khan an pisa, Mizo Hnam Rûnah chhung inkhawm an nei a, MNF National Core Committee member D Thangliana'n thu sawiin, "MNF hian Mizoram zalenna sualin bei ta lo se la, tuna kan dinhmun hi kan chang phak lo mai thei," a ti. Ngopa VC president K Lalremsiama pawhin thu sawi, Ngopa-in India rama gram panchayat (VC) hna thawk ṭha ber lawmman Nanaji Deshmukh Sarvottam Panchayat Satat Vikas Puraskar an dawn chanchin a sawi a ni.

Governor tanpuina

Khawzawl district bawrhsap K Lalrohlua chuan nimin khan Khawzawla Chhanchhuahna Home hnenah Governor’s Discretionary Grant aṭangin ṭanpuina Rs 25,000 a hlân.