Ruihhlo Do khuhhawnna hun hmang

Nimin khan Assembly Annexe Conference Hall-ah Ruihhlo Do khuhhawnna hun hman a ni a; Excise & Narcotics leh Social Welfare enkawltu minister Lalrinawma, Ruihhlo Do Working Committee (RDWC) chairman ni bawkin hmanpuiin, pawl, sorkar department leh district hrang hrang bawrhsapte hnenah ruihhlo dona atana hman tur cheng nuai 300 a sem.

Ruihhlo Do khuhhawnna inkhawm hi RDWC vice chairman R Lalngheta, Central YMA president-in a kaihruai a; Lalrinawma chuan, ruihhlo leh a kaihhnawih harsatnain Mizoram a rùn nasat thu leh ruihhlo hman sual leh dan loa tawlhrûkin mimal leh khawtlang nun a tihchhiat thu a sawi.

Lalrinawma chuan, ruihhloin hmasawnna a tihṭhuanawp thu leh pawikhawihna leh dan bawhchhiatna a thlen nasat thu a sawi a; chief minister Zoramthanga hmalaknain May 2022 khan Core Committee on Ruihlo Do din a nih thu sawiin, "Committee-in a rel angin Social Welfare Minister nia ka chairman-na hnuaiah Working Committee din nghal a ni a, ruihhlo donaah chak zawka hmalak a nih theih nan supply reduction, demand reduction leh harm reduction-ahte mumal taka thawhho a ṭul," a ti.

Working Committee chu vawi thum an ṭhutkhawm tawh thu sawiin Minister chuan, "Core Committee chairman CM Pu Zoramthanga, Finance minister ni bawk remtihnain thawhho dan turte ruahmanna siamin, sum mamawh zat duan a ni a, kan mamawh ang min pe thei hi ruihhlo donaa thawktute a ngaih pawimawhzia a lang chiang hle," a ti a; ruihhlo donaah NGO, khawtlang, chhungkua leh mi tin ṭanrual a ṭul thu a sawi.

Ruihhlo Do khuhhawnna hian district hrang hrang DC leh SP te, Police, Excise & Narcotics, Food & Drugs Administration leh MSACS hotu te, Central YMA, Central YLA leh MTP hruaituite an tel a ni.