Sorkar hnathawk hlawh lâk theih loh Congress party-in mak an ti

Congress party chuan, April thla a tàwp dawn hnai tawhah pawh Mizoram sorkar hnathawk tam takin March thla hlawh an la thei lo chu mak an ti a, Finance enkawltu chief minister Zoramthanga hlawhchhamzia tichiangtua an ngaih thu an tarlang.

Mizoram Pradesh Congress Committee chuan thuchhuah siamin, sorkar hnathawk tam takin hlawh an lak theih loh chhan, ‘IFMIS hman thiam loh vang a ni’ tia Finance department hotute'n an sawi chu a dik tawh lo tih department hrang hranga hlawh siamtute an kawmna aṭangin a lang tih an tarlang a; Integrated Financial Management and Information System (IFMIS) chuan harsatna a thlen ngei a, mahse, IFMIS vanga harsatna chu department-te thiam loh ni loin, IFMIS system-ah fel lo tam tak a awm vang zawk a nih thu an sawi.

MPCC chuan, kum hnih kal taah IFMIS chu hman tura tih a nih tawh rualin, tun thlengin system-ah fel lo a tam nia sawiin, "Portal-a luh theih loh te, approve theih mai loh te, luh hleih theih loh cháng te, bawhzui fé pawha approve mai theih lohte a tam em em," an ti a; sorkar thiam loh a nih thu leh Finance minister Zoramthanga’n mawh a phurh len ber thu an tarlang.

Congress party-in sorkarna an chan laiin sorkar hnathawk nghette hlawh lâk theih loh a awm ngai lo nia sawiin MPCC chuan, "Congress sorkar hnuaiah sorkar hnathawkte'n a hun taka hlawh an lak mai bakah, GPF leh bill hrang hrang hun rei tak tihkhawtlai a awm ve ngai lo," an ti.