CADC-ah hming pek luh hun a tàwp

May 9, 2023-a Chakma Autonomous District Council (CADC) inthlanpui neih tura chuh tumte tan hming pek luh hun chu nimin tlai dar 3 khan a tàwp a, mi 70 chuangin hming an pe lut nia thu dawn a ni.

CADC-ah hian member of district council (MDC) seat 20 a awm a; political party-te'n candidate an puana a lan danin, BJP, INC leh MNF party-te'n bial zawng zawngah candidate an dah dawn a, ZPM-in candidate 13 an nei bawk.

Party palite'n an candidate tur an puan zingah CADC-a chief executive member (CEM) lo ni tawh an awm vek a; chu'ngte chu BJP-ah Amit Kumar Chakma, INC-ah Adikanti Chakma, MNF-ah Kali Kumar Tongchangya leh ZPM-ah Santi Jiban Chakma leh Bhudda Lila Chakma te an ni.

Inthlana chuh tumte hming pek luh chu vawiin hian endik a ni dawn a, inhnûkdâwk leh duhte tan April 27, 2023 chhun dar 12 thleng hun hawn a ni ang.

CADC-ah MDC bial 20 awmin, polling station 70 a awm a, voter 35,885 awmin, mipa 18,208 leh hmeichhia 17,677 an ni.