Governor leh MZP hruaitute inkâwm
Governor Hari Babu Kambhampati leh Mizo Zirlai Pawl (MZP) Gen.Hqrs hruaitute chu nimin khan Raj Bhavan-ah an inkâwm. MZP hruaitute chuan The Mizoram Maintenance of Household Register Bill, 2019 leh Mizoram University-a politics kaihhawih programme siam ṭhin chungchang an thlen.
Governor chuan, The Mizoram Maintenance of Household Register Bill, 2019 a sawifiah a; India President pisa aṭanga zawhna, Mizoram sorkara a kaihhnawih hotute'n an chhàn hunah President pisa aṭangin Raj Bhavan-ah a rawn kîr leh tura a ngaih thu a sawi.
MZP hruaitute chuan, tun hnaiah Mizoram University chhungah zirna kaihhnawih thil ni lo, politics lam thil programme huaihawt leh mikhualte thleng an awm ṭhin nia sawiin, ṭha lo an tih thu an sawi a; chutiang thil chu ngaihvena en zui turin Larsap an ngen.