Pathianin BJP-te a hmang dawn - Mizoram BJP President

BJP, Mizoram Pradesh president Vanlalhmuaka chuan, kumin MLA inthlanpui awm tur chu BJP-in Mizoramah hma­sawnna lungphùm an phùmna tur leh Mizorama retheihna ûm bona hun bul ṭanna tur a nih thu leh, Mizoram damna turin Pathianin BJP-te hmanruaah a hman dawn thu a sawi.

Nimina Aizawla BJP pisaa political session-ah thu sawiin Vanlalhmuaka chuan, Mizoramah BJP-in hmasawnna nasa tak an nei niin a sawi a, "Kum 2023 inthlan lo awm tur hi BJP-te'n Mizoramah hmasawnna lungphùm kan phùmna hun tur leh Mizorama retheihna ûm bona hun bul ṭanna tur a ni dawn a, politics vanga Mizoram mipui buma awm mekte'n development chanchin ṭha an hriat zel theih nan ṭan kan lâk a ngai," a ti.