CM-in Tuichang lei thar a hawng: “Mipui a lêt 2/3 châwm zo ram kan nei” - Zorama

Keiṭum leh Arṭahkawn inkar Tuichang luia lei dawh thar chu nimin khan chief minister Zoramthanga'n a hawng a, Mizoramin Pathian malsawmna a dawng nasa a, a chhunga chêng mipui a lêt hnih/thum châwm zo ram a neih thu a sawi.

Chief Minister chuan, "Lei dawh hawn thar a nih hian a hnuaia tui luangte chhûtin Pathian malsawmna kan dawn tamzia hi kan ngaihtuah a ngai a, mipui a lêt hnih/thum châwm zo ram kan nei... Mizoramin lui kan ngah hi kan vanneih phah tak tak a ni," a ti.

Tuichang lei thar hi kum 2016-ah dawh hna ṭan niin, kum 2018-a dawh zawh tura ruahman a ni a, a dawh dan tur thlak a nih avangin kum 2019-ah zo tura tih leh a ni. Metre 68-a sei, metre 7.50-a zau a ni a, thîr hmanga dawh niin, a chhuat chu RCC a ni a, lei dawhtu chu Sadguru Engineers & Allied Services a ni.

Lei dawhna atan cheng nuai 754.75 hmuh ni a, a hnuah dawh dan tur thlâk a nih avangin SASCI aṭangin cheng nuai 259.45 pek belh a ni. Lei dawhna atana sum hman zawng zawng chu nuai 1,010.35 a ni a, March 31, 2023-ah dawh zawh a ni.

CM Zoramthanga chuan, India ram phai­zawl lam a lum chak hle tih sawiin, "Aizawl pawh a lum ve ṭhin ta hle. Ṭo a lo thleng a, vawt kan ti leh mai a, Pathianin he ram min pek hi a tâwk thawkhat viau tihna a ni. Lui kan nei tam hi malsawmna a ni. A hlâwkna a tam a, a buaithlakna pawh a tam," a ti a; lui ṭangkaizia an chhar chhuak zel dawn niin a sawi.

Zoramthanga chuan MNF-in independence an puan chungchang sawiin, "Mizoram independent sualin India kan kâp a, mahse, chunglamin ṭul a la ti rih lo. Independent nei loin remna siamin kan chhuak. Chunglamin hnam thinlung ka pe tawh che u a, independent hi ka engtopui lo che u, a ti rih a ni," a ti.

Chief Minister chuan, Pathianin a chanchin ṭha hril turin Mizote a duh nia sawiin, "Thilmak chunga thilmak hmanga min chhanhimna chu hei hi a ni, a ram chanchin ṭha hril tura min ruatna meichher kan vawn tlat hi kan felnaah a ruat a ni," a ti a; chanchin ṭha hril thuthlung vuan tlat turin mipui a chah.

Tuichang lei hawnnaah hian minister Lalchamliana, Hrangturzo bialtu MLA pawhin thu sawiin, thawhhona ṭha avangin hripui léng leh harsatna dang karah lei dawh puitlin a nih thu a sawi.

Lei hawnna hun hi PWD joint secretary Lalhmasaa'n a kaihruai a, PWD engineer-in-chief C Lalchhuana leh contractor aiawhte'n lei chanchin leh a dawh dante an sawi a ni.