Jail táng tlân chhuak man belh

April 19, 2023 zing khawvar hmaa Lunglei District Jail-a táng tlân chhuak mi panga zinga Lalchawimawia (24) s/o Piangthiauva, Thangte, Lunglei district chu Thawhṭanni zan zanlai pelh hnu, dar 12:30 vel khan man a ni.

Vanglaini thu dawn danin, Lalchawimawia hi loa fehte'n hmuin, khawtlang hruaitute an hriattir a; chumi hnuah Hnahthial Police bakah, Khawhri leh Tarpho khawtlang hruaitute'n nimin dar 12:30 am vel khan Khawhri mite thlámah an man a ni. Lalchawimawia hi a lo chau tawh hle a, District Jail-ah dah luh nghal a ni. Amah hi September 6, 2021-a Vanlalduati, Lunglei Chanmari vih hlum thubuaiah September 9, 2021-a man a ni.

Tarlan tawh angin, Lunglei District Jail aṭanga tlân chhuak zinga pahnih chu April 20, 2023 khan Mausen YMA hruaitute'n an khaw bula thingpui dawrah an lo man tawh a; mi pahnih dang - Haudeihchhun (25), Tlangnuam, Champhai district leh Vanneihthanga (38), Leisen, Myanmar-te erawh man an la ni lo.