Zodintluanga bànna hruaitu dangte nen kan la ngaihtuah dawn - Lalsawta

Mizoram Pradesh Congress Committee (MPCC) president Lalsawta chuan, Zodin­tluanga Ralte-in MPCC treasurer a nihna aṭanga bànna a thehluh chu an pawm dawn leh dawn loh hruaitu dangte nen an la ngaihtuah dawn thu leh, an thutlukna an la puan dawn thu a sawi.

Lalsawta hi Delhi aṭangin nimin khan Aizawlah a rawn haw a, Lengpui Airport-ah Congress party mi eng emaw zatin an lo hmuak. Nimin vêka amah lawmna Congress Bhavan-a buatsaihah Lalsawta chuan, Zodintluanga Ralte-in bànna a thehluh chungchang sawiin, "Kan vice president Pu Lal Thanzara te, kan senior-te nen kan ngaihtuahho ang a, a bànna pawm tur a nih leh nih loh chungchang kan sawiho ang a, Mizoram mipui hriatah kan la puang ang," a ti.

Harsatna an tawh mek chu Congress party an sorkarna tura harsatna an tawh pakhat­ah ngai tura chahin Lalsawta chuan, "Heng harsatnate hi awm lo turin ṭawngṭai mah ila, harsatna a lo thleng tho tho ṭhin. Party dangte ang bawkin harsatna kan tâwk ve a ni," a ti a; mipui rawngbáwl tur leh mi retheite khai chhuak turin Pathianin rem a tih chuan a hûng chhuak leh ngei dawn niin a sawi.

Lalsawta chuan, India ramah Congress kaihhruai sorkar pian theihna a sáng hle nia sawiin, "Opposition party lian zawng zawngin Congress kaihhruai sorkar siam duhin hma an la a, kum 2024-a Lok Sabha inthlanpui awm turah Congress sorkar a piang ngei dawn niin a lang," a ti a; party dangte'n Mizoramah Congress an dingchhuak tawh dawn lo angin an sawi tih sawiin, "Khu lama zawmpui nei lote pawhin sorkar an tum chuan keini chu hmabak duhawm tak a ni," a ti.

Congress president chuan, sorkar ṭha din an tum tih sawiin, "Kan ram tan tih theih kan nei tih kan hre chiang a, kan thlahlel a, tih tur kan hre bawk. Congress party mipui hian ram tana kan tih tur hlen chhuah kan tum. Kum 2023 hi kan thil tum a taka kan hlen chhuah hun tur a ni," a ti a; an buaipui chu Mizoram mipui tana sorkar ṭha siam a nih thu a sawi.