Sorkar ve hrim hrim châkin ZPM an tuihâl huam huam - MNF Media

MNF Media & Publicity department hotute chuan nimin khan Aizawl Press Club-ah thuthar thehdarhtute an kâwm a, sorkar ve hrim hrim châk vanga tuihâl huam huamah ZPM party an puh.

MNF Media general secretary VL Krosshnehzova chuan, ZPM-in sorkar an châk em avangin tih hreh an nei lo nia sawiin, "ZPM hi sorkar ve hrim hrim châkin an tuihâl. Tih hreh leh tih duh loh an nei ta lo hial niin kan ngai. An din tirh lama thianghlim ber leh ṭha bera insawi ṭhinte kha an danglam ta hle," a ti.

VL Krosshnehzova chuan, October 25, 2018 khan ZPM chief ministerial candidate Lalduhoma'n, 'BJP leh Chakma telna sorkar kan neih lohna turin Mizo mipui hian a mala sorkar thei turin ṭangrual pawl hi min siam a ngai' tia a sawi thu sawiin, "Chakma candidate an neih ve loh tur thu leh Chakma ramah ZPM an din loh tur thu an sawi fo," a ti a, Chakma candidate nei MNF leh Congress chu Mizo hnam leh Mizoram tlûkchhiat pawiti loah a puh.

Chakma hua inti leh party dangte puhchhiatna atana hmang siin sorkar an châk luatah Chakma Autonomous District Council-ah ZPM an din tih sawiin Krosshnehzova chuan, "Hnam chhiatna thlentu tura an puh Chakma-te chu fachuam enin an en ta," a ti.

MNF Media hruaitute chuan, ZPM working president K Sapdanga'n November 23, 2022 khan Hriphaw-ah 'Minorities unaute, Bru leh Chakma-te enhranna ZPM-ah a awm lo' tia a sawi thu tarlangin, "Hei hi duh tâwk loin Mizorama political party dangte pawhin kan tih ngai loh an ti a, ZPM General Secretary chuan Chawngteah Chakma pa chawimawina parṭhi a awrhtir hial a ni," an ti a, Mizo hnam tan tlàwmthlak an tih thu an sawi.

MNF Media & Publicity tarlan danin, May 9, 2023-a CADC inthlan tura ZPM candidate tur mi 13 zinga palite chu eirûk thubuai nei leh pakhat chu thiam loh chantir tawh a ni.