Sorkar ṭha, thianghlim leh mipui sorkar pek lêt ngei kan tiam - ZPM Working President

ZPM working president K Sapdanga chuan, ZPM party chu sorkarah mawhphur tura mipuiin an siam phawt chuan mipui hnenah sorkar ṭha, thianghlim leh mipui sorkar pek lêt ngei an tiam tih a sawi a; MLA inthlanpui atan party ṭhenkhatin sum an ngah thu mipui hriatah an puan laiin, ZPM chuan sum an neih loh thu a sawi bawk.

ZPM party chuan April 24, Thawhṭanni zan khan Music Home, Zonuamah ZPM Fund Raising Campaign hawnna an buatsaih a, thu sawitu K Sapdanga chuan, "Mipui, a bikin ṭhangtharte'n sorkar ṭha leh rintlak, corruption do ngam tur, mipui hmai êng zah nachang hria sorkar kan neih theih ngei nan kan remchan ang zat apiang thawh a, mipui sorkar min tuak chhuahpui turin mi tin kan sáwm. ZPM hi mawhphur tura min siam phawt chuan sorkar ṭha, sokar thianghlim, mipui sorkar pek let ngei kan tiam nghal bawk," a ti.

Sum thawh theihna an siam chhan sawiin Sapdanga chuan, Mizorama mipui inhawnna te, India ram leh ram danga Zo hnahthlakte inhuamnate an hria a, party unit leh block hrang hrangin sum tuaka an hnatlangte an hmuhin Campaign Fund thawh theihna siam ṭha an ti a, sum thawh theihna remchang an siam thu a sawi.

ZPM Working President chuan, kumin kum tàwp lamah MLA inthlanpui a awm dawn tih sawiin, "Party ṭhenkhat chuan sum hman tur an neih ngahzia mipui hriatah an puang dum dum a, keini ZPM chu sum hman tur nei ve lo, inthlan dawna pûk tur dapa buai viau tur tiin min rûmṭhaih a, an hre dik. Kan khingpuite'n an candidate-te puih nan bial pakhatah cheng nuai za tam an dahṭha tawh tih thâwmte kan hria a, ZPM erawh chuan kan candidate-te hnenah sum pai tur kan nei ve lo," a ti.

K Sapdanga chuan, ZPM unit-te hnenah an biala ding candidate-te tlemtê tal pawisa lo pài ve turin an ngen tih sawiin, "Unit ṭhenkhatin huan sâmin, ṭhenkhatin ràwrâ chhúin, an candidate-te lo puihna tur sum an tuak. Huan sâm a, ràwra chhúa kan tuak chhuah kan MLA-te'n mipui min rawk duh hauh lo ang tih kan ring a, hmasawnna hna thawhna atana sum lo lut pawh an hlêp ru duh lo ang tih kan ring nghet tlat," a ti a; candidate-te tana sum tuaka inhlawhte an chhuan thu a sawi.

ZPM consultant W Chhuanawma pawhin thu sawiin, páwl rêng rêng sum tel loin an kal thei lo tih a sawi a, "He party hian sum mamawhna avangin tu thuhnuaiah emaw a kûn a lo ṭul a nih pawhin Mizo mipui kuta tlûk luh hi kan duh ber a ni," a ti.

ZPM hian Fund Raising Campaign hawnna an hman chhung hian thawhlawm báwm an hùnah mi eng emaw zatin Rs 9,35,077 an thawh hman a, sum thawhtute chungah an lawm tih an tarlang. Sum thawh dun tan ZPM bank account no 40620167263, IFSC SBIN0001539-ah thawh theih a nih thu leh sum tling khawm zat a remchan angin puanzar zel an tum thu an tarlang bawk.