Lawmman dawng pha turin LAD Minister-in VC-te a chah

Ngopa khuain India rama panchayati raj (VC) hna thawk ṭha ber lawmman, Nanaji Deshmukh Sarvottam Pancha­yat Satat Vikas Puraskar (NDSPSVP) an dawn chungchangah Local Admi­nistration Department (LAD) minister K Lalrinliana chuan nimin khan a pisaah thuthar thehdarhtute a kâwm a; Ngopa khuain Mizoram a chawimawi thu sawiin, VC dangte pawh ṭan la turin a chah.

LAD Minister chuan, Mizorama VC ṭhenkhatin India ram pum huap lawmman an dawng nual tawh tih sawiin, "Lawmman lo dawngte'n lawmman an dawnte a lawmawm em em a, Ngopain lawmman an dawn hi a ropui zual a, Mizote leh Mizoram min chawimawi hle. Mizote hnam dangin min hmuh sàn phah a, min hmuh sàn phah angin VC zawng zawngin ṭan kan lâk vek a ṭul," a ti.

K Lalrinliana chuan, pan­chayati raj kalphung ang chu Mizoramah pawh hman ve theih ni se ṭha an tih thu a sawi rualin, "Kan official-te pawhin an zir chiang tawh a, mahse, kan la ti thei rih lo," a ti a; VC dan tharte pawh siam ṭha an tih rualin, an la ti thei rih lo tih a sawi.

Ngopa VC president K Lalrem­siama chuan, intihsiaknaa tel hrim hrim chu a hlâwk hle tih sawiin, "Form fill-up ringawt pawh kan hlâwkpui a, tel ve hrim hrim nih pawh a hlu. Theme pakhat ringawt pawh dawng tura ûm tham a ni. Lawmman dawn tuma hma kan lâk chuan, lawmman dawng chiah lo mah ila, a hlâwkna khawtlangin kan hmu nghal," a ti.

K Lalremsiama chuan, lawmman an dawn theih chhan chu an khaw mipui ṭanrualna a nih thu sawiin, "Ṭanrual a ngai hle. Khawtlang mipuiin VC thu leh hla an awih em em a, mipui inlungrualna leh ṭanrualna vang a ni," a ti a; an lawmman dawn chu Ngopa dawn ringawt ni loin, Mizoramin a dawn a nih thu sawiin, VC/khaw dangte pawhin ṭan an lâk phawt chuan an dawn theih ngei a rin thu leh ṭan la ve se a duh thu a sawi bawk.

LAD director Rita Lal­nun­­mawii Pachuau chuan, Ngopa VC lawmman dawnin a ken cheng nuai 150 hmanna tur project an siam tawh thu a sawi.

Tarlan tawh angin, Ngopa hian gram panchayat (village council) 2,55,000 vel zingah Sustai­nable Development Goals 17 tih­hlawh­tinna tura Localization of Sustainable Development Goals (LSDGs) theme hrang hrang pakuaa ti ṭha ber lawmman April 17, 2023 khan an dawng.