KHAWTHLIR

Chhawmdawlna pe

Mizoram Synod chuan tun hnaia rial tla vanga chhiatna tâwk Chhippui, Kawnmawi leh Lallen khuaa chhungkaw 169 hnenah April 24, Thawhṭanni khan Synod Relief Fund aṭangin chhawmdawlna Rs 19,54,000 an pe. Ṭanpuina hi Lallena in 100 tan Rs 12,05,000, Kawnmawia in 37 tan Rs 4,21,000 leh Chhippuia in 32 tan Rs 3,28,000 an pe a ni.

Minister-in endik

Minister of state Robert Romawia Royte chuan nimin zing khan a bial chhunga Chite lei dawh mek leh Chhinga Veng Bethany road-a lei pahnih dawh mek a tlawh a, thawktute chu theihtawp chhuah turin a chah. Chite lei Chite Venga Convention Centre sak mekin a ken tel a ni a, Tourism ministry aṭanga sum hmuh nuai 131.94 hmanga dawh a ni.

DC silver jubilee

April 25, Thawhṭanni khan Mamit DC conference hall-ah Mamit DC kum 25-na, silver jubilee an lawm a, DC hlui Nghaklianmawia, MCS (Rtd) khuallian a ni. Inkhawmah hian Mamit DC hlui Vanlalngaihsaka leh YMA Sub-Hqrs, Mamit president Vanlalchhuanga Chhangte te pawhin thu an sawi a; tlaiah jubilee lawmna ruai an ṭheh. Mamit DC pisa hi April 24, 1998 khan mi in luahin bul ṭan a ni a, DC hmasa ber chu Z Lalhmingliana, MCS a ni.

Minister-in thlen

Commerce & Industries minister Dr R Lalthangliana chuan April 24, Thawhṭanni khan Delhi-ah Bangladesh high commissioner Md. Mustsfirzur a hmu a, Bangladesh leh Mizoram insumdawn tawnna tura hmalakna kal mekah chak taka hmalak a ṭul thu a thlen.

Hruaitu thlang

Spastic Society of Mizoram chuan kum 2023-2025 chhunga hruaitu tur an thlang thar a, president-ah Chhingpuii, Chhinga Veng leh secretary-ah Neihtluangi, Dawrpui Veng an thlang.