Vankal Solar Park hawn a ni

Nizung chakna hmanga kawlphetha siam chhuahna bun thar, Vankal Solar Park chu nimin khan Power & Electricity minister R Lalzirliana'n a hawng a; thawktute zingah awlsam taka sum leh pai siam tum an awm thu leh man an nih chuan dan anga hmalak tum a nih thu a sawi.

Kawlphetha megawatt 20 pe chhuak thei tur Vankal Solar Park hawnna, Vankal Community Hall-a buatsaihah hian R Lalzirliana chuan, "Thawktute zingah awlsam taka sum leh pai siam tum an awm a, man chhuah an nih chuan an chungah dan anga hmalak zel tum a ni," a ti.

Vankal Solar Park puitlin a nih theihna tura ram petu Vankal khawtlang mipui chhuanawm a tih thu sawiin, "Power supply tel loa nun a harsa tawh a, hna thawhna hrang hrangah a tel loa hmalak a harsa," a ti a; department hmalakna ṭha taka thláwp turin mipui a sáwm.

Hawnna inkhawm hi PE engineer-in-chief Lalhmingliani Hmar-in a kaihruai a; bialtu MLA Dr L Thangmawia bakah, MLA dang Dr ZR Thiamsanga leh H Lalzirliana te pawhin thu an sawi.

VANKAL SOLAR PARK

■ Mizoram sum nuai 1,707 leh Ministry of New & Renewable Energy sum nuai 400 sênga siam a ni.

■ Civil work atan nuai 272.38 leh electrical work thawh nan nuai 1834.77 hman a ni.

■ August 2018-ah bul ṭan a ni a, February 16, 2023-ah trial commissioning tih niin, March 18, 2023-ah commercial operation ṭan a ni.

■ Ram acre 144-a zauah solar plate/module 52,453 bun a ni.

■ Sunfree Northeast Renewable Energy leh ATA Renewable P4 ten solar plate an bun.

■ Sunfree Northeast Renewable Energy-in kawlphetha MW 15 siamna tur an buaipui.

■ ATA Renewable P4-in MW 5 siamna tur an buaipui.

■ Kum 25 chhung company-in an enkawl chhunzawm dawn.

■ Kawlphetha siam chhuah chu Mizoram sorkarin unit khat Rs 3.94-in a lei dawn.

■ Nimin khan a chak lai berin kawlphetha MW 19.06 thleng a pe chhuak.