Education & Digital Transformation zirhona

Mizoram University leh Amrita University (Amrita Vishwa Vidyapeetham), Kerala chuan nimin khan G-20 pualin MZU Department of Education seminar hall-ah Civil 20 (C20) Mizoram Conclave on Education & Digital Transformation an buatsaih a, Governor Dr Hari Babu Kambhampati-a'n a hmanpui.

Governor chuan, India ramin G20 president mawhphurhna a chelh mek tih sawiin, "Mawhphurhna pawimawh tak a nei a, G20 president a nihna anga tihhlawhtlin a tum zinga pawimawh ber pakhat chu hmasawnna tluantling, awmze nei leh nakin huna nghawng ṭha lo nei lo siam a ni," a ti.

Mizoram pawhin zirna huangah tunlai thiamna hmang ṭangkai turin ṭan a lâk a ngaih thu sawiin Larsap chuan, "Mizoramah eizawnna atan mi tam zawkin tlang ram lo neih kan hmang a, hei hi khawvel sik leh sa inthlak danglam nasa takah a hlâwk loh bakah a him lo chho telh telh," a ti a; zirna leh technology lamah thiamna bik eng emaw neih tum a ngaih thu a sawi.

Governor hian Amrita University leh MZU ten Science and Technology Innovation Hub (STI Hub) an din hmanga tribal mite zirna, eizawnna leh khawsak phung tihhmasawn tura hmalakna tur programme a hawng nghal. MZU leh Amrita University thawhhona hnuaiah hian Aizawl leh Serchhipah STI hub siam a ni ang.

Conclave-ah hian chief secretary Dr Renu Sharma, Central YMA vice president Lalhmachhuana leh Working Group on G20 national coordinator Prof Prema Nedungadi te thu an sawi bawk.