Sikserh sawihonaah Dr Thangtea a tel

April 24, Thawhṭanni khan Delhi-ah 'Asia Pacific Leader's Conclave on Malaria Elimination' neih a ni a, Health minister Dr R Lalthangliana telin, sikserh dona atan Mizoramin motor leh thawktu a mamawh thu a thlen.

Health Minister chuan, Siaha, Lawngtlai leh Mamit district-te chu ramri hrûla awm an nih avangin sikserh a la tam thu a sawi a, "Inkalpawh zung zung theih nan motor ṭhahnem tak, duh anga hman zung zung tur leh kum nga tal thawktu tur eng emaw zat mamawh a ni," a ti.

Mizoram chauh ni lo, khawvelah ei leh in uar vang leh taksa vawn ṭhat loh avangin heart attack, stroke, cancer, zunthlum leh sikserh vangin ṭhalai tam takin nunna an chán ṭhin thu a tarlang bawk.

Dr R Lalthangliana chuan, Mizoram chu NITI Aayog-a small state zingah Mizoram chu pakhatna a nih thu leh infant mortality rate-ah Mizoram chu a hniam ber a nih thu a sawi a; National Health Mission-a thawktu sorkar laipuiin a pek belh tawh loh chu tinung thar leh turin Union Health Minister a ngen a ni.