Y-20 Brainstorming Session buatsaih

Young Indians (YI) Mizoram leh Ministry of Youth Affairs and Sports chuan nimni khan Pachhunga University College-ah Y-20 Brainstorming Session an buatsaih a, minister of state Robert Romawia Royte-in a hmanpui.

Robert Romawia Royte chuan, kutkawih eizawnna lama hlawhtling turin information technology hman thiam a pawimawh thu sawiin, "Social media hrang hrangte hi hman thiam phawt chuan game-changer a ni thei a, thu dik leh dik lo thliar thiam a, hriatna dik zawng a, ngaituahna hman thiam a pawimawh," a ti.

Minister chuan, nu leh pa, pi leh pute hausakna chhawm ṭhalai tamna ram a changkang ngai lo nia sawiin, "Mahnia ding chhuak hlawhtlingte tamna chu ram changkang leh ropui a ni. Mizoramah sorkar hna kher ni lo, sumdawnna lama hlawhtling ṭhalai tam tak an awm tawh. Sum hnár thianghlim loa hausate chu mipuite'n an hnualsuat a, an ngaihnêp ngam a ṭul," a ti a, sum lâk luhnaah fimkhur a ṭul thu a sawi.

Inkhawmah hian YI Mizoram Chapter chairman Sobin Jaishi leh PUC principal Dr H Lalthanzara ten thu an sawi a; ZONET Cable TV director Vanneihtluanga, Mt. Carmel School principal Lalnunkunga Sailo, Lailen consulting director Alan Lalhriatpuia, LB Associates hotu Lalbiakmawia Ngente, Trinity Hospital director Dr Lalrintluanga Jahau leh Zozia neitu Lalṭanpuii ten thu an sawi bawk.