PC-in campaign pamphlet an tlangzarh

Peoples' Conference party president Vanlalruata chuan nimin khan an party pisaah inthlan atan campaign ṭanna a hawng a, PC campaign pamphlet a tlangzarh. Pamphlet-ah hian inthlan awm tura PC party auhlâ tur tlangpui tarlan a ni.

Vanlalruata chuan, PC party chu hun rei tak chhung mihring nei ṭeuh siin, che hlei thei loin an awm tih sawiin, "Tunah chuan kan tho chhuak leh ta a, Mizorama party office nalh, changkang leh nuam ber tur sak hna kan thawk mup mup a ni. Ram siamṭhat leh tihhmasawn duhtu tan kan hnenah hmun a awm a, lo kal u la, kan ram hi siamṭhain tihmasawn tak tak turin hma i la tláng ang u," a ti.

PC party chu ram mamawha innghat policy nei a nia sawiin Vanlalruata chuan, "Mizoram hian tihsual kan nei a, kan ram economy chawi chhuak turin agriculture leh a kaihhnawih lamah ṭan lain sorkar kan tilian zel a, tunah hian party dangte hmalak tumna chu hemi hawi tho hi a ni. He kalphung hian hma min tisâwn thei tak tak lo tih hmu reng chunga party dangte heti záwnga an la kal zel hi a pawi a, kan economic policy hi chu industry leh entrepreneurship lama ṭan lakna tur a ni," a ti a; an policy chu a ṭha bik hle niin a sawi.