World Book Day hman a ni

Mizo Zirlai Pawl (MZP) General Headquarters chuan nimin khan an conference hall-ah World Book Day an hmang a, minister Lalruatkima'n hmanpui.

UNESCO-in a puan angin kum 1995 aṭang April 23-ah World Book Day hman a ni a, Mizoramah chuan MZP hmalaknain kum 2022 khan hman ṭan a ni. April 23 hi kuminah Pathianni a nih avangin nimin khan hman a ni a, kumina Day thupui chu 'Indeginous language' tih a ni.

Lalruatkima chuan, kumina World Book Day thupui 'Indeginous language' tih chuan tualchhuak ṭawng humhalh leh tihhmasawn a kâwk tih sawiin, "Khawvelah ṭawng tam tak a ral tawh a, hmangtu an tlem vang emaw, hmangtute an chak tâwk loh vangte emaw a ni," a ti a; Mizo ṭhalaite chu lehkhabu chhiar uar tur te, social media-a thu léng vel ring mai loa chanchinbua ziakte chhiar uar turin a chah.

World Book Day hmannaah hian Book of the Year 2022 'Daidanna bang phena thuruk' tih ziaktu Dr Zohmangaihi hnenah lawmpuina hlan a ni a; ziaktu lâr C Lalnunchanga kawmna hun hman a ni bawk.