Mizoram tana ro tling siamtu chu Congress party kan ni - Zodintluanga

Congress Legislature Party (CLP) leader Zodintluanga Ralte chuan nimin khan West Phailengah Congress party zawm tharte lawm luhna hun a hmanpui a, Mizorama ram tana ro tling hmasawnna thlentu chu Congress party an nih thu a sawi.

Zodintluanga Ralte chuan, tum neia hma la a, sorkarna chelh apianga mirethei khaichhuahna programme nei ṭhin chu Congress party an nih thu a sawi a, "Kan ram dinhmun a chhe em em a, ram siamṭha turin Congress party a sorkar leh a ṭul hle a ni," a ti.

CLP Leader chuan, MNF sorkarin an sawp chhiat vek tawh Tuirial Hydel Project leh State Referal Hospital chu Congress sorkarin tharthawhin a tihpuitlin thute a sawi bawk.

John Rotluangliana pawhin thu sawiin, kum 2023 inthlanah Congress party president Lalsawta, mi hmingṭha leh sum enkawl thiam hoin an sorkar ngei dawn niin a sawi a, "Kan sorkar hrawn mek hi sorkar hlawhchham a ni. SEDP an sem thei lo a, party mi leh sa tlemtê hnenah Rs 25,000 an sem hram a, healthcare-ah an hlawhchham ṭhak bawk," a ti.

Inkhawmah hian Congress party zawm thar mi 250 lawm luh an nih thu an tarlang.