Sorkar hnathawkte'n a huna hlawh an lâk theihna'n hma an la dawn

Mizoram sorkar hnathawk pawl hrang hrang intêlkawmna Federation of Mizoram Govern-ment Employees & Workers (FMGEW) chuan nimin khan Vanapa Hall-ah General Confer-ence vawi 32-na an hmang a; Mizoram sorkar hnathawkte'n a hun taka hlawh an lâk theih nan hmalak an rél.

Nimin chawhnu lama FMGEW rorelah hian, sorkar hnathawkte chungchang leh an hlawh kaihhnawih thil chi hrang hrang ngaihtuah a ni a; "Mizoram sorkar hnuaia sorkar hnathawkte'n a hun taka hlawh kan lâk theih nan FMGEW-in chak zawkin hma la rawh se," an ti.

Mizoram sorkar hnathawk zawng zawngin pension scheme hlui an hman theih nana hmalak leh, Integrated Financial Manage-ment and Information System (IFMIS) chu duhthusama hman theiha peih a nih hma chuan hman rih loh a, a hma anga hlâwh lâk chhunzawm a nih theih nan hmalak an rél bawk.

Agenda pakhat, 'Sorkar sum sen tihtlem nan sorkar hnathawk nghet pay level-6 leh a chung lam (ACP leh non functional promotion vanga pay level-6 leh a chung lamte huam vekin) sorkarin ration buhfai subsidised rate-a a pek hi tihtawp vek ni rawh se,' tih erawh chu pawm rih loin, la zir chian leh turin an dah.

FMGEW inkhawmpuiah hian chawhma lam inkhawm chu senior vice president R Lalrammawia'n a kaihruai a; khuallian chief minister Zoramthanga leh FMGEW president Lalchuailova ten thu an sawi. Secretary general J Ramdinmawia'n an pawl dinhmun leh hmalakna tlangpui a sawi bawk.

Chawhnu lamah rorel a nih bakah MJA kaihhruaiin kum 2023-2025 chhunga office bearer turte an thlang a, mi 10 thlan chhuah niin, an nihna tur an la insiam rem dawn a ni.

FMGEW hi November 24, 1973-ah din a ni a, sorkar hnathawk pawl hrang hrangte an tel. Covid-19 lên laiin hripui dona leh puih ngaite ṭanpui nan Chief Minister's Covid-19 Relief Fund-ah Rs 5,82,31,200 an chhûng lut a ni.