AR hmuna ram nei insawifiah lote ram neih sorkarin a titawp dawn

Aizawl khawpui chhunga Assam Rifles hmuna ram neitute chu Land Revenue & Settlement (LRS) department-in insawifiah turin a ti a, insawifiah lote chu an ram neih LSC/house pass-te sorkarin a tihtawpsak dawn.

LRS Director chuan March 24, 2023 khan Assam Rifles hmuna LSC leh house pass neitute chu show cause notice a pe a, The Mizoram Land Revenue Act, 2013 Section 33(2) tlawhchhanin insawifiah turin a hriattir a ni.

The Mizo District Land Revenue Act, 1956 Section 8 tlawhchhanin mimalin ram neih theih a ni lo tih tarlangin LRS Director chuan, Revenue officer-te thu dik lo hmanga bum vanga lo nei ve ngawtah a puh. Assam Rifles hmuna ram neih chuan The Mizoram (Restriction on Use of Transferred Land) Act, 2002 a kalh niin a tarlang.

LSC leh house pass neitute chu an ram an neih dante sawifiah a, an LSC leh house pass-te tihtawp (cancel) a nih loh chhan tur chiang taka tarlang tura hriattir an ni a; insawifiahna hun hi thla khat chhung pek niin, April 24, 2023 khan hun tiam a tàwp a ni.

Vanglaini palai zawhna chhangin LRS department hotute chuan, ram neitute zingah insawifiah eng emaw zat an awm thu a sawi a, "Insawifiah lo pawh an awm. An ram cancel sak kan tum avanga insawifiah tura ti kan ni a, insawifiahna hun siam loa cancel ngawt chu ṭha kan ti lo," an ti.

LRS department hotute sawi danin, insawifiah lote chu an ram neih tihtawpsak a ni dawn a, insawifiahte erawh chu an insawifiahna zir chian phawt tur niin, zir chian a nih hnuah hmalak dan tur ngaihtuah a ni ang.

Hetih lai hian, Assam Rifles hmuna ram nei mi pahnih chuan tun hnai khan an ram neihna lehkha pawimawh (document)-te sorkarah an thehlut a; heti hian mi 10-in AR hmuna an LSC/house pass-te sorkarah an pe lêt tawh. a ni.

Vanglaini thu dawn danin, Assam Rifles ram chhungah hian mi 61-in ram an nei a; battalion headquarters (Lammual leh a chhehvel)-ah mi 54-in LSC leh house pass neiin, Assam Rifles commandant bangla ram chhungah mi paliin an nei a, MacDonald Hill-a AR hmunah mi pathumin an nei bawk.

Mi 10-in an LSC/house pass sorkarah an thehluh tawh avangin tun dinhmunah chuan Assam Rifles ram chhungah ram pass nei mi 51 an la awm mek a ni.