Kawng chi tinrênga financial problem awm loa kal hi ka vision a ni - CM Zorama

Chief minister Zoramthanga, Finance department enkawltu chuan, Integrated Financial Management and Information System (IFMIS) chu hman ngei a ngaih thu a sawi rualin, thil tibuaithlaktu tak a nih thu a sawi a, kawng chi tirengah, sum leh pai leh healthcare-a harsatna awm loa kal chu a hmathlir (vision) a nih thu a sawi bawk.

CM Zoramthanga hian nimin khan Vanapa Hall-a Federation of Mizoram Government Employees & Workers (FMGEW) General Conference a hmanpuinaah thu sawiin, "IFMIS hian hlawh inpek tawh tur an ti a, hemi formula hian finance hi kalpui tawh tur an ti a, hreh takin kan han hmang lui a ni. Ti thuai thuai rawh u an ti a, kan ti thuai thuai dawn alawm ti chungin kan ti ṭhal ṭhal ve bawk," a ti.

Finance Minister chuan, IFMIS chu Finance lam pawhin hautak an tih thu sawiin, "Kan la thiam mang si lo a, training a ngai a, a buaithlak a, pawisa lâkna tur a tikhawtlai. Muan avanga zuih ral chi a ni si lo," a ti a; IFMIS chu sorkar hnathawk, a buaipuitu turte'n an zir chak ve a ngaih thu a sawi.

Sorkar hnathawkte'n beisei leh duh an neihte chu a remchan ang zela bawhzui a nih thu sawiin Zoramthanga chuan, "Kan sum dinhmun erawh chu in hriat tlàn kha. Finance dinhmuna kan harsat dante min hriatthiampui a, chuta ṭanga kan kal zel dan tur thutlukna leh remruatnate in neih theih ka duh," a ti.

Chief Minister chuan, medical re-imbursement (MR) chu sum harsatna avangin inpek ṭeuh theih a ni lo a, hrehawm an ti tih thu sawiin, "ADB-ah loan la ila kan ti a, cheng vbc. 1,000 kan han ti pawp mai a. Kawng chi tinréngin sorkar hnathawkte pawhina problem an neih lohna tur, mipui pawhina problem an neih lohna tur, kan healthcare-in financial problem a neih lohna tur hi ka vision a ni," a ti a, harsatna awm loa chhawp chhuah chu a tum a nih thu a sawi.

Health Care Scheme chu an sorkar hmasak hun laia ADB aṭanga loan an lâk hmanga bul an ṭan a nih thu sawiin Zoramthanga chuan, "Amaherawhchu, kum 10 kan chhuṭi vang vang a, chumi hnuah kan han ṭan leh a, a lo harsa tawh. ADB-ah bawk loan kan ti a, vbc. 1,000 min han phalsak hlauh a ni," a ti a; ADB-a loan vbc. 1,000 lak tur chu politics thilah sawisel a nih thu sawiin, "Cheng vbc. 1,000 aṭanga vbc. 720 chu a free a ni a, sorkar laipuiin min rulhsak tur a ni. Vbc. 720 rulhsak tur han pûk chu a'n ṭhatzia an ṭhatzia chuh... lawm taka awm tur kan ni. A hnuhnung lama joker pawh leh zâl zâl ang a ni," a ti.

Zoramthanga chuan, health care te, sorkar hnathawk hlawh leh pension hlawhte chu harsatna awm loa kalpui an tum thu sawiin, "Thui tak kan achieve tawh a, kan healthcare hi problem awm loa kal hram hram kan tum. Tunah harsatna kan nei a, nakinah kan financial problem kan solve hunah sutkian kan tum," a ti a, theihtawpin hma an lak thu a sawi.

FMGEW-in sorkar hnathawk nghet, pay level-6 leh a chung lamte tan sorkarin ration buhfai subsidy-a a pek tihtawp an rawt chu lawmawm a tih thu sawiin CM Zorama chuan, "Sorkar rawt àwm tak a ni a, a ropui kan ti. Hetiang a nih chuan kan duhthusam a ni," a ti a; sorkara an awm chhungin an hnua awm leh zel turte tan kumkhuaa sorkarna nei tur anga an thawh a ngaih thu sawiin, "Vawiina kan tih hi a tlo tur a ni," a ti bawk.