Book of the Year lawmman hlân

Mizo Academy of Letters (MAL) chuan kum 2022 chhunga Mizo ṭawnga lehkhabu chhuak zinga ṭha bera an thlan, 'Daidanna bang phena thuruk' tih ziaktu Dr Zohmangaihi hnenah Book of the Year 2022 chawimawina an hlan.

Chawimawina hlan inkhawm hi MAL din champhaah hlan ṭhin a ni a, Central YMA Hall-ah hlanna inkhawm hman niin, Art & Culture minister R Lalzirliana'n Dr Zohmangaihi hnenah chawimawina thuchei leh Rs 10,000 a hlân a ni.

Inkhawm hi MAL president Prof. RL Thanmawia'n a kaihruai a; minister R Lalzirliana chuan, "Mizo ṭawng humhalh leh tihhmasawn hi hnam tana thil pawimawh tak a ni," a ti. Minister hian MAL member-te ziah lehkhabu pali a tlangzarh nghal.

Kum 2022 chhung khan Mizo ṭawnga ziah lehkhabu 203 a chhuak a, chu'ng zinga hmun thuma ṭhena hmun khat aia tam chu Kristianna lam hawi a ni. Lehkhabu khawn khawm zinga panga chu Myanmar rama chhut leh tihchhuah a ni a, Tripura-a tihchhuah pahnih a awm bawk.