Governor hoin tui harsatna sawiho

Governor Dr Hari Babu Kambhampati chuan nimin khan Raj Bhavan-ah Public Health Engineering department hotute leh Zopar Export aiawhte a kâwm a; Reiek, Ailawng leh a chhehvela tui harsatna sutkian dan tur a sawipui.

PHE department hotute chuan, Reiek, Ailawng leh a chhehvel châwm tura siam Reiek Water Supply Scheme-in mipui mamawh a phuhru zo tawh lo tih an sawi a; Zopar Export managing director Rajesh Prasad pawhin tui lâk chungchanga an harsatnate a sawi.

Larsap chuan, PHE department leh Zopar Export aiawhte thu thlen chu a ngaih pawimawh thu a sawi a; a ṭul anga project siama hmalak dan tur an sawiho a ni.

Floriculture uar a pawimawh thu sawiin Larsap chuan, "Mizorama khualzinte kan hîp theih-na pawimawh tak pakhat a ni a, hemi atan hian sorkar leh kutkawih eizawnna lama hma latute'n thawhhona ṭha an neih a pawimawh," a ti.

Inkawmhonaah hian PHE Secretary, Chief Engineer leh hotu dangte bakah, Zopar Export Managing Director-te an tel a ni.