KHAWTHLIR

Oxygen generation

plant hawn a ni

Adventist Hospital, Aizawla oxygen generation plant bun thar chu nimin khan Manpower Development Board vice chairman Zothantluanga, MLA-in a hawng. Adventist Hospital hian Adventist Development Relief Agency kaltlangin oxygen generation plant a dawng a, cheng nuai 24 man a ni a; cheng nuai 13 chuangin a tihnunna tur transformer leh a dahna tur in an sa/siam bawk.

Zawhna siam zirho

Mizoram Board of School Education chuan nimin khan Champhaia High School leh Champhai Higher Secondary School zirtirtute tan 'Capacity Building of Teachers in Setting HOTS Question' tih thupui hmangin School Education training hall-ah zawhna siam dan inzirtirna an buatsaih. MBSE-in Scheme of Examinations and Question Design a hman mek, Integrated Evaluation Schemes leh application software chungchang inhrilhfiah a ni bawk.

Water pump hawng

Lunglei South bialtu MLA Dr K Pachhunga chuan nimin khan a bial chhunga Lungrang South-ah Upper Lungrang leh Lungrang South châwmtu tur Solar Water Pump a hawng. Solar Water Pump hi Rs 89,90,800 sénga siam a ni a, mi 1,276 châwm thei tura chhût niin, kum 2051 thleng mi 1,684 châwm zo tura ngaih a ni.

MLA-in hmanpui

Vangchhia High School chuan nimin khan an kum 50-na, golden jubilee an lawm a, bialtu MLA Ramthanmawia'n hmanpuiin, jubilee lungphun a hawn bakah souvenir a tlangzarh. Vangchhia H/S hi kum 1998-ah din a ni a, kum 2003-ah lumpsum grant-in-aided ah hlan kai niin, kum 2008-ah adhoc grant-in-aided ah hlan kai leh a ni.

EVM hman tur

Chakma Autonomous District Council inthlanpuia hman tur electronic voting machine (EVM)-te hmanna tur hmun thlanna (randomisation) vawi khatna nimin khan Chawngte SDO (Civil) pisaah returning officer David Lalthantluanga hoin neih a ni. MDC bial 20-a hman tur EVM 70 thliar a ni a, a ṭul huna hman tura dah hran 40 a awm bawk.

Admit card download theih

Higher & Technical Education (H&TE) dept. chuan thuchhuah siamin, State Medical And Technical Entrance Examination (SMATEE) exam tur online application submit tawhte chuan admit card dhte.mizoram.qov.in/ ah a download theih thu an tarlang. H&TE dept. tarlan danin, exam ṭan hma darkar chanveah mahni ṭhutna ah ṭhut ṭheuh hman tur a ni. Harsatna neite chuan Technical Wing, Higher & Technical Education-ah office hun chhhungin zawhfiah theih a ni.