RD Minister leh Puducherry Minister inkâwm

Mizoramin MGNREGA-a kalpui dan zir tura rawn kal Puducherry DRDA minister AK Sai J Saravanan Kumar leh Rural Development minister Lalruatkima te chu nimin khan Aijal Club-ah an inkâwm a, Mizoramin MGNREGA a kalpui dan zirho a ni.

Lalruatkima chuan, AK Sai J Saravanan Kumar leh amah ṭawiawmtute chu Mizoramin a lo làwm tih sawiin, "In hlâwkpui ngei ka beisei," a ti a; uluk taka zirchianna nei tur leh Mizoramin MGNREGA-a kalpui dan kalphung ṭha laite hàwna hmang ve ngei turin a sáwm.

Mizoramin hlawhtling taka MGNREGA-a a kalpui theih chhan ber chu deparment-a thawkte inpekna, thawhrimna leh inhlawh ṭhinte aṭanga ṭawiawmna ṭha tak a awm vang a nih thu sawiin RD Minister chuan, "Rethei leh khawsak harsa zawkte ṭanpui hi sorkar thil tum lian ber pakhat a nih avangin MGNREGA hi uluk, felfai leh dik taka kalpui a ni," a ti.

Lalruatkima chuan, Mizoram chu India ramah MGNREGA kalpui ṭha berte zing a mi a nih thu sawiin, "Lawmman pawh Mizoram hian a la fo tawh. Ṭha tak leh dik taka hna thawhnain rah ṭha a chhuah mek," a ti bawk.

Puducherry Minister chuan, Mizoramin ṭha taka MGNREGA a kalpui thei leh hlawhtlinna 100% a nei thei chu RD Minister thawhrimna leh inpekna nia a hriat thu a sawi a, "Mizoramin MGNREGA a kalpui dan ṭha takte hi Puducherry-ah pawh hman ve ngei a nih theih nan theihtawp ka chhuah ang," a ti.

Zirhonaa tarlan danin, MGNREGA hi Mizo-rama khua (gram panchayat) 866-ah kalpui mek a ni a, job card 2,14,384 pek chhuah tawh niin, MGNREGA hnuaia inhlawh ṭhin mi 2,29,685 an awm. MGNREGA hnuaiah hna 18,945 ṭan tawh a ni a, hna 13,887 (73.3%) zawh tawh a ni.