Mizo hnam ral loh nan fa neih tam a ṭul - Minister Lalrinawma

YMA Sub-Head-quarters, Serchhip chuan nimin khan Chhingchhip Venghluna Hrangliana Rûnah inkhawmpui vawi sarihna an hmang a, minister Lalrinawma'n a hmanpui. Minister chuan, Mizo hnam a ral mai loh nan fa neih tam a ṭul tih a sawi.

Lalrinawma chuan, "Mi tam takin ei leh bâr harsatna chhuanlamin fa ngah an hreh ṭhin. Châwm tur kan pungah ngai lo ila, thawktu tur kan pung zelah i ngai zawk ang u," a ti.

Mizo hnam hrang hrangte chu an hnam zia zahpui lo tura chahin Minister chuan, "Kan hnam ziaráng leh ṭawng a ral rualin keini hi kan ral ve nghal dawn tih hriain, kan hnam ze tinte hi zahpui tur a ni lo a, kan ṭawngte hi hmang tlem tial tial tur a ni hek lo. Kan chetzia leh kan ṭawngte hi zirna-inah leh ni tin nunah kan uar deuh deuh tur a ni," a ti a; India sorkar pawhin tribal-te ziarâng leh ṭawngte a ral a hlauh avangin Ministry of Tribal Affairs a din tih a sawi.

Social Welfare minister Lalrinawma chuan, Mizorama HIV/AIDS a hluar lutuk chu a vei thu sawiin, "Mipat hmeichhiatnaa kan him tawk loh vang a ni ber. Nulate chauh pasal neih hmaa thianghlim tura beisei loin, tlangvalte hian thianghlim taka nupui nei thei nih kan tum a ṭul a ni," a ti.

Serchhip Sub-Headquarters YMA inkhawmpui hi vawiinah chhunzawm a ni dawn a, vawiin chawhmaah rorel a ni ang a, chawhnuah hruaitu thar thlan a ni ang.

YMA Sub-Head-quarters, Serchhip-ah hian branch 74 leh group pathum an awm a, member 38,154 an awm mek a ni.