CADC inthlan chuh tum zinga mi pahnih hnâwl a ni

Chakma Autonomous District Council-a member of district council inthlanpui chuh tuma hming pe lut mi 76-te nomination paper chu April 25, Thawhlehni tlai dar 3 khan returning officer David Lalthantluanga hoin Chawngte SDO (Civil) pisaah endik a ni a, mi pahnih hnâwl niin, mi 74-te nomination pawm a ni.

Inthlan chuh tuma hming pe lutte zinga hnâwl takte chu Indian National Congress candidate ni tura hming pe mi pahnih an ni a, an pahnih hian standby a nih thu sorkar thuchhuahin a tarlang. Inthlan hi May 9, 2023-ah neih a ni dawn a, chuh tuma hming pe lutte tan vawiin chhun dar 12 thleng inhnuh dawhna hun hawn a ni.

CADC inthlanpui vawi 11-naah hian political party pathum Bharatiya Janata Party (BJP), Indian National Congress (INC) leh Mizo National Front (MNF) ten bial awm zawng zawng chuh tumin mi 20 ṭheuhin hming an pe lut a; Zoram People's Movement-in bial 13 chuhin, independent candidate pakhat a awm bawk.