Zo fate inpumkhatna tichhe thei ṭawngkam hmang lo turin ngen

Zo Reunification Organisation (ZORO) chuan, tunlaiin social media hrang hrangah Zo fate inlungrualna leh inpumkhatna nghawng chhe thei ṭawngkam mawi lo tak tak a tam chu pawi an tih thu an tarlang a, "Zo fate inpumkhatna leh inlungrualna tichhe zawnga ṭawngkam mawi lo hmang lo turin Zo fate kan ngen," an ti.

ZORO chuan, Mizote chu ram hrang hrangah sorkar hrang hrang hnuaiah an awm tih sawiin, "Kan awmna ṭheuh sorkar kalphung a inang lo. Zo fatete hi rorelna pakhat hnuaia kan la awm hma chuan mahni awmna ṭheuh min awptu sorkar dante ṭha taka kan zawm tlàn a ngai," an ti a; mahni awmna sorkar dan leh hraite inzahsak tawn a ṭul thu an tarlang.

Mizote chu hmun hrang hrangah awm mah se, unau an nihna a bo lo tih sawiin ZORO chuan, "Ṭawng a inan loh vang te, kan chezia leh duh dan a inang loh vanga unau kan nihna hi bo a ni lo. Pathian ruat sa, thisena inzawm unau kan nih hi hre thar leh ṭheuh turin Zoram mipui kan ngen a ni," an ti.

ZORO chuan, Manipur-a Mizo Kristiante biak-in tihchhiat a ni chu pawi an tih thu sawiin, "Sakhaw zalenna palzûtnaah kan ngai a, kan dem tak zet a, Zo fate chungah hetiang hi thleng tawh lo se kan duh," an ti a; Zo fate'n harsatna an tâwk a nih chuan an harsatna sutkian a nih theih nan hma an lak zel dawn thu an sawi bawk.