Champhaiah RT-PCR laboratory hawng

Health & Family Welfare minister Dr R Lalthangliana chuan nimin khan Champhai District Hospital-ah RT-PCR laboratory, Paediatric Intensive Care Unit (PICU) leh Trauma Centre a hawng a; Champhai Vengtharah damdawi-in, Urban Primary Health Centre (UPHC) thar, Mizorama UPHC pakuana a hawng bawk.

RT-PCR laboratory hi Eye Ward building-ah bun a ni a, Health & Medical Education sum nuai 21 hmanga din a ni. January 10, 2022-ah bun ṭan a ni a, April 6, 2023-ah zawh a ni.

PICU chu sorkar laipuia Emergency Covid Response Package-II sum nuai 14.40 sénga sak a ni a, April 30, 2022-ah sa ṭanin, November 30, 2022-ah an sa zo. Trauma Centre chu Ministry of Health & Family Welfare sum nuai 80.83 sénga din niin, LB Associates-in an sa a ni.

Champhai UPHC-ah hian khum paruk a awm a, OPD, laboratory, immunisation, NCD leh programme hrang hrang kalpui a ni. Doctor pakhat, staff nurse pathum, health worker pahnih, pharmacist, laboratory technician leh accounts clerk pakhat ṭheuh leh group D pahnih an awm.

RT-PCR laboratory hawnnaah Dr R Lalthangliana chuan, a thil hawn tâkte chu neitu thinlung púa enkawl a pawimawh thu a sawi a, "Hmanraw changtlung tak nena thuam, damlo na zual enkawlna tur khum 50 awmna Critical Care Block, Mizorama hmasa ber tur cheng vbc. 20 senga din tum a ni a, cheng nuai 120 sengin integrated public health laboratory din tum a ni," a ti.

Health Minister chuan, Khawzawl, Saitual leh Hnahthialah cheng nuai 1,700 séngin damdawi-in changtlung tak leh thawktute chenna tur eng emaw zat sak a nih dawn thu a sawi bawk.

Hawnna inkhawmah hian Champhai South bialtu MLA TJ Lalnuntluanga, Champhai North bialtu MLA Dr ZR Thiamsanga, Health secretary Esther Lalruatkimi, Champhaia Synod Rescue Home director Rev. H Lalrinmawia leh official dangte pawhin an tel a ni.