Mi 72,245-in Aizawl Sahuan an tlawh; Delhi Zoo aṭangin vavû lâk a ni dawn

Aizawl Zoological Park (Aizawl Sahuan) chu kum 2022-23 chhungin mi 72,245-in an tlawh a, tlawhtute aṭangin Rs 12,03,120 an hmu. Aizawl Sahuan hian Delhi sahuan aṭangin vavu chi khat, silver pheasant paruk an la dawn.

Aizawl Sahuana Range Officer hnen aṭanga thu dawn danin, sorkar kum 2022-23 chhung khan Aizawl Sahuan chu mi 72,245-in an tlawh a, kum 10 chung lam mi 48,828 leh kum 10 hnuai lam mi 23,417 an ni. Sahuan tlawhtu, lirthei leh camera ken man aṭangin Rs 12,03,120 hmuh a ni a, pawisa an hmuhte chu sorkar sum báwmah an chhûng lut a ni.

Ramsa inthleng tawnna hmangin Aizawl Sahuana záwng hmai sen pariat chu Delhi Zoo-a dah a ni dawn a, chuta tan chuan Cental Zoo Authority aṭangin phalna an hmu tawh. Delhi Zoo aṭang hian vavu chi khat, silver pheasant a nu leh a pa tuak thum, a vaiin paruk lak a ni thung dawn a, Aizawl Sahuanah dah a ni ang. Vavu hi Mizoram state bird a ni.

Aizawl Zoologoical Park hi chawlhkar tin Thawhṭanni leh Inrinni inkarah mipui tlawh theih hawn ṭhin a ni a, Pathianniah erawh chuan khàr a ni.