Dengue vei 2,292 hmuh a ni tawh; mi 5-in an thihpui tawh

Mizoramah Dengue natna vei mi 2,292 hmuh chhuah a ni tawh a, mi pangain an thihpui tawh. Mizoramah dengue a pun ve zel avangin May 3-4, 2023 chhung khian State Vector Borne Disease Control Programme (SVBDCP) chuan Aizawla local council leh pawl hrang hrang hotute dengue donaa thawhho dan tur an sawipui dawn.

SVBDCP chhinchhiah danin, Mizoramah kum 2019 khan dengue vei hmuh ṭan a ni a, chuta ṭang chuan nimin thleng khan mi 8,395 endikah dengue vei mi 2,292 hmuh chhuah tawh a ni. Kumin 2023 bikah dengue vei mi 143 hmuh chhuah a ni tawh a, thihpui erawh an la awm lo.

Mizorama dengue vei hmuh chhuah tam ber kum chu kum 2022 kha a ni a, mi 5,242 endik aṭangin dengue vei mi 1,868 hmuh chhuah a ni. Dengue thihpui tawh mi pangate pawh kum 2022 chhunga mi vek an ni a, kum dangah dengue vanga thi an awm lo thung.

SVBDCP chuan, dengue natna chu Mizoram mipui tam takin an la hre chiang lo tih tarlangin, "Mipui zin veivâk pung leh ram leh ram intlawhpawhna ṭhate avangin Mizoramah dengue vei kan pung ve zel. Khawvelah dengue hi natna hluar chak ber zinga mi niin, Mizoramah pawh tun hnaiah dengue vei an pung chho a, Aizawl district leh Lunglei district-ah a hluar bik," an ti.

Dengue natna chu a pun chak avangin invên kawngah ṭan lâk reng a ngai tih sawiin SVBDCP chuan, "Kumin 2023-ah pawh hei aia nasa zawka pung zel thei a nih avangin khawtlang, kohhran leh páwl hrang hrangte ṭangkawp a, nasa lehzuala ṭan lak a ṭul hle," an ti a; dengue chu malaria tluka buaipuiawm a nih mai a hlauhawm thu an tarlang.

Mizorama dengue pung zel tur ven nan SVBDCP chuan May 3-4, 2023 chhungin Aizawla Chanmari YMA Hall-ah dengue chungchang leh invèn dan inzirtirna an buatsaih dawn. Inzirtirnaah hian AMC huam chhunga local council, YMA, MUP leh MHIP member-te tel tura beisei niin, tel turte chu kim taka tel turin SVBDCP chuan an ngen a; Aizawla veng tina hmalak dan tur leh thawhhona turte duan a ni ang.