CM leh MPCC President nih ka tum ngai lo - Lalsawta

Mizoram Pradesh Congress Committee president Lalsawta chuan, Chief Minister nih leh MPCC President nih a tum ngai loh thu a sawi a; hausak tum leh hausak vanga MLA nih tum chu ram hmelma a nih thu leh Congress party MLA turte chu taima, huaisen leh mi dik an nih chuan a tâwk an tih thu a sawi bawk.

Lalsawta hian nimin khan Lungdai, Kawnpui, Kolasib leh Bilkhawthlira an party hruaitute a tlawh a; sorkar hna a thawh hnuah mipui rawngbawlna zau zawk neih tumin politics a zawm tih sawiin, "Politician in hmuh ang hi ka ni ve lo. Chief Minister nih ka tum ngai lo. MPCC President nih ka tum ngai lo. Kum 2018 hnuah chawlh hahdam ka tum. Mahse, ramin min koh avangin Mizoram tana sorkar ṭha pe turin ka lêt leh chauh a ni. Hausak leh zual ka tan a ṭul lo. Tuna ka dinhmun aia nawmsak zawk ka thlahlel lêm lo," a ti.

MPCC President chuan, "Ram rorelnaa tel turte chu mi langsar leh lâr, mi hausa hnawh khawmna tur a ni lo," a ti. An candidate-te theihtawpa pui tura chahin, "A awm ang ang eia ina sorkar ṭha siam turin kan thawk ang. Inṭanpui tiha pawisa khawn lam a ni lo," a ti a; ram hruai hna chu phûr thut thil a nih loh thu a sawi.

Kumina MLA inthlan­pui awm turah kil thum aṭangin an inbei mek tih sawiin Lalsawta chuan, "Keini chuan hausak tum leh hausak vanga MLA nih tum hi neih belh tumna mai a ni a, mipui chan ai hmangin sum an tuak dawn a, heng hi ram hmelma a nih avangin Congress party-in kan MLA turte chu mi taima, huaisen, mi dik an nih chuan a tâwk," a ti.

Congress President chuan, "Tum ka nei a, Mizoram ka hruaina tur kawng ka hria. Chu chu Mizoram tan pawh a ṭha a, Pathian pawhin mal min sàwm ka ring... Mizoram hmakhua atan rorelna ṭha pek hi ka bat a ni a, chu chu ka tum a ni a, ka duh ber a ni bawk. Ka ti ang ka tih theih chin chauh ka sawi ṭhin," a ti a; Mizoram mipui hnenah sorkar ṭha an pek theihna tura sut tlang ngai chu political will hmanga a sut tlang dawn thu a sawi.