Aizawlah Vohbik Kûtpui buatsaih

Aizawl District Election Office chuan nimin khan Lammualah Vohbik Kûtpui an buat­saih a, Social Welfare & Tribal Affairs minister Lalrinawma'n a hman­pui. Minister hian vokbik (rualbanlo)-te enkawl­na sikulte tan vawiin Zirtawpni hi sikul chawlh­ah a puang.

Vohbik Kûtpui pual hian rally buatsaih hma­sak a ni a, Vanapa Hall kawt aṭanga Lammual thlengin kawng an zawh. Lammualah Kûtpui hman a ni a, intihhlimna chi hrang hrang buatsaih a ni. Ephatha Special School, Shining Star School, Gilead Special School, Special Blind School, Redeem Garden leh Rephedim Home aṭangin zirlaite'n zai, làm, recitation leh thil dang chi hrang hrang an entir a ni.

Minister Lalrinawma chuan, vohbikte'n vote an thlâk a pawimawhzia inzirtirna ni pah tura Aizawl DEO pisain kût an buatsaih chu ropui a tih thu sawiin, "India ramah hian hlim taka an awm hi an chanvo a ni. Mi tinin rorelnaah aw kan thawh theih nan chanvo kan nei a, chu chu vote thlak a ni. Vote thlâknaa vohbikte kan tel vek a pawimawh," a ti.

Vote thlâk chu mi tin chanvo leh mawh­phurhna a nih thu sawiin Lalrinawma chuan, "India hi inthlang ram kan ni a, khua leh tui kumtling tawhte chuan vote thlak hi mi tin chanvo a nih angin, ngai pawimawh turin mipui ka ngen a ni," a ti a, vobikte'n vote an thlak ngei theih nan sorkarin ruahmanna a siam thu a sawi.

SWTA Minister chuan, vohbikte hlim taka an awm theih nan mi tinin mawh an phur tih sawiin, "Inzirtirnaah pawh hmalak zel a ṭul. Sorkar pawhin dan siamin, scheme-te a siam a, a theih ang angin hmunhma hrang hrang­ah an kal ve zel theih nan hmalak a ni," a ti a; Vohbik Kûtpui chu hman chhunzawm zel ṭha a tih thu a sawi bawk.