Mizo contractor zingah GST hmanga chhiah pe an la tlem

Mizorama Goods and Services Tax (GST) dinhmun zir tura rawn zin CEX & Customs, Guwahati Zone chief commissioner Yogendra Garg chuan nimin khan Governor Dr Hari Babu Kambhampati chu Raj Bhavan-ah a kâwm a; Mizo contractor zingah GST hmanga chhiah pe an la tlem thu Larsap a hrilh.

Yogendra Garg chuan, Mizo­ramah GST kaltlanga chhiah petu an la tlem thu sawiin, "A bik takin Mizo contractor-te zingah GST hmanga chhiah pe an la tlem hle. Mipui zingah GST chungchang hre chiang tâwk lo an la tam hle niin ka hria," a ti a, GST pe lo an tam avangin sorkarin chhiah a hmuh tur ang a hmu lo tih a sawi.

Inkawmnaah hian sorkar laipui aṭanga state GST hotute mumal taka training neihpui chungchang te, mipui zingah GST uar zawka zirtir leh GST-in hamṭhatna a ken telte inhrilhfiahna lam kalpui chungchangahte hmalak a ṭul thu sawi a ni.

Export processing zone leh special economic zone chungchang te, Mizorama hna thawktute hna thawhna hmun siamṭhat leh Mizoram thar tihpun a nih theih nana leilung hausakna chak zawka hai chhuah chungchang te, GST chu a nih dan tur ang taka kalpui a ṭul thute an sawi bawk.