Larsapin PMAY-a hmalakna sawipui

Governor Dr Hari Babu Kambhampati chuan nimin khan Raj Bhavan-ah Rural Deve­lopment department hotute a kâwm a, in sak ṭanpuina, Pradhan Mantri Awas Yojana (Grameen) hmalakna leh hmasawn dan a sawipui.

Dr Hari Babu Kam­bham­pati chuan, sorkar kum ṭhenkhata in sak ṭanpuina sum instalment ṭhenkhat dawn kim a nih loh chhan te, sorkar laipuiah bawhzui a nih leh nih loh te, Mizoram sorkarin a tih tur a tih leh tih lohte a zâwt a; sorkar laipui aṭanga zawhna an rawn siamte chu zing deuh mahse ṭha leh rang taka chhang zel turin RD deptt. hotute a hrilh.

Mizorama RD depart­ment-in a tih tur chinte ṭha taka a ti chung pawha sorkar laipui lam aṭanga sum pek a muang a nih chuan Governor office aṭangin theihtawp chhuah­pui a inhuam thu Lar­sap chuan a sawi bawk.

Inkawmnaah hian RD secretary Dr Lalzirmawia Chhangte leh hotu dangte an tel a; PMAY(G) hnuaia an hmalakna hrang hrang - in sak tawh zat, in sak zawh tawh zat, instalment hrang hranga ṭanpuina dawn tawh chinte an tarlang a ni.