Tlawng luia túr phultute man an ni

Lunglei police-te chuan April 26, Nilaini zan khan Lunglei mipui tui tlan Tlawng luia túr phultu mi pathum an man.

Lungleia PHE SDO chuan April 26 khan Lunglei Police Station-ah FIR a thehlut a, Lunglei khawpui tana tui an lâkna Pialthleng luiin Tlawng a pawhna velah Pialthleng Pump House-a duty-te'n kaikuang leh chakai thi eng emaw zat an hmuh thu leh Tlawng luia nungchate chu túra hrai ni ngeia an hriat thu a thlen a ni.

Police-te chuan thil thlenna hmuna Maruti Suzuki Eeco MZ-02 C-1368 hmanga kal - Lalawmpuia (43) s/o Thunrai leh Lalfakawma (26) s/o Lalrinhlua, Lunglei College Veng ve ve leh Lalmuankima (32) s/o Tangkarai, Rahsi Vengte an man a ni. Mi pathumte chuan Tlawng lui hraitu an nih thu police hmaah an puang a, an túr (damdawi) hman chu record (cypermethrin 10%) a nih thu an sawi.

Tlawng luia túr phul chungchangah hian YMA, Lunglei College Veng Branch chuan thuchhuah siamin, Lunglei mipuiin an tui tlan ber Tlawng tui túra hraitute zingah an veng mi Lalfakawma leh Lalawmpuia an tel ve chu pawi an tih thu an tarlang a, Lunglei mipuite hnenah ngaihdam an dil.

College Veng Branch YMA chuan, Lalfakawma leh Lalawmpuia chu an vengah mi in luaha awm an nih thu tarlangin, "College Veng chhunga khawsa­in Lunglei mipui pawi nasa tak an khawih hi hrehawm kan tiin zahthlak kan ti hle. Lunglei mipui hnenah ngaihdam kan dil a, thupha kan chawi tak meuh a ni," an ti.