KHAWTHLIR

TKP-in thisen pe

ṬKP, Tlabung Pastor Bial chuan nimin khan BCM, Tlabung Gospel Centenary Building-ah thisen pek huaihawtin, Lunglei Civil Hospital tan thisen unit 52 an pe a, petute mipa 54 leh hmeichhia pariat an ni.

Kuhva rah man

Serchhipa hmunpui nei Assam Rifles sipaite chuan nimin khan Champhai Zotlangah Myanmar aṭanga dan loa lak luh kuhva rah ip 342 an man a, Champhaia Customs ho hnenah an hlân. Kuhva rah an man chu cheng nuai 191.52 hù a nih thu an tarlang.

Sikul jubilee lawm

Farkawn khuaa Thanchhuma High School chuan nimin khan golden jubilee an lawm a, bialtu MLA Ramthanmawia'n a hmanpui. MLA chuan, MNF kaihhruai sorkar kal mek chhungin zirtirtu muster roll, CSS hnuaia Hindi zirtirtu, SEDP leh Samagra hnuaia zirtirtu leh HSS lecturer lak zinga 147 chu East Tuipui bialah dah an nih thu a sawi a; zirlaite chu ruihhlo laka fihlîm tur leh aia upate zahna chhawm nung zel turin a fuih. Thanchhuma H/S hi kum 1973-ah din a ni a; kum 1975 khan Adhoc Aided-ah, kum 1985 khan Deficit GIA-ah leh kum 1991 khan sorkar sikulah hlankai a ni.

Hmalakna thlirho

Kolasib DC John LT Sanga hoin nimin khan Kolasib Chief Medical Officer pisaah Covid-19 laka mipui himna tura inpuahchahna leh khum 100 awm theihna District Hospital thar sak mek dinhmun thlirho a ni. Kolasib District Hospital chu NESIDS sum nuai 1,859.87 hmangin VRC Constructions (I) Pvt Ltd, New Delhi-in an sa mek a, thla 24 chhunga zawh tur a ni.

Tribal Artisan Mela

Nimin khan Serchhip DC conference hall-ah Tribal Artisan Mela buatsaih a ni a, bawrhsap Nazuk Kumar-i'n a hmanpui. Mela-ah hian UDPA department, Cooperation department leh MzSRLM hnuaia self help group, cooperative society leh mimal 60 velin an thil siamte an pho chhuak a; vawiin hian Thenzawl khelmualah chhun­-zawm a ni ang.