Governor-in Hackathon a hawng Mizoramah cyber crime case 1,033 a awm

Mizoram Police leh National Institute of Technology, Mizoram (NIT)-in police hnathawh ṭanpuina tur ngaituah chhuak tura computer thiamte intihsiakna, Hackathon chu nimin khan Governor Dr Hari Babu Kambhampati-a'n Police Headquarters-a Arya Mess-ah a hawng.

Hackathon-ah hian India ram hmun hrang hranga National Institute of Technology zirlaite, Mizoram University, Zirtiri Residential Science College, NIELIT leh ICFAI University-a computer zirlaite an tel a; police-te'n dan leh thupek an kenkawhnaa harsatna an hmachhawnte an zir chiang ang a, chumi behchhan chuan smart policing atana technology ṭha ngaihtuah chhuah an tum dawn a ni. Intihsiakna hian April 29, 2023 thleng a awh ang.

Governor chuan, Mizoram police-te'n hlawhtlinna lian tak tak an nei tih sawiin, "Dan leh thupek kenkawhnaah te, ruihhlo doah te, hnu chhuiah te, pawi khawihna chhui chhuahah te, Aizawl leh khawpui danga lirthei veivâk mumal taka kaihhruaiah leh thil dangahte hna ropui tak an thawk a ni," a ti.

NIT leh Mizoram Police-in computer thiam, zirlai hmabak êng tak neite tana ram venhimna lama thluak thawh tura chona an siam chu ṭha a tih thu sawiin Larsap chuan, "He intihsiakna hian rah ṭha tak a chhuah ka ring," a ti a; computer thiam bik, zirlaite chu ram tana an theihna sang ber chhuah turin a fuih.

Director general of police (DGP) Devesh Chandra Srivastava pawhin thu sawiin, Prime Minister-in ram venhimna atan police-te technology thar ber bera thuam turin hma a la a, India ramah smart policing chak taka kalpui mek a nih thu a sawi.

Tun hnaiah cyber crime a pung nasa tih sawiin DGP chuan, "Sum chungchanga inbumna, mipat hmeichhiatna rawng kaia pawikhawihna, child pornography leh dark web kaltlanga dan bawhchhiatna a hluar mek. Mizoramah pawh cyber crime kaihhnawiah pawikhawihna a pung nasa," a ti.

DGP sawi danin, Mizoramah cyber crime thubuai 1,033 ziah luh a ni tawh a, chumi kaihhnawihah chuan dan bawhchhia mi 54 man tawh niin, mi 16 chu thiam loh chantir tawh an ni.