MNF sipai ruhro phawrh a ni

Ex-Mizo National Army (MNA) chuan nimin khan MNF sipaia lance corporal Laltlankima ruhro chu Zawlnuama a thlàn aṭangin an phawrh a, Martarte Thlànmual, Luangmualah an dah dawn.

MNF ṭhalaite tarlan danin, Laltlankima hi Saitual khua a ni a, kum 21 mi a nih laiin Zawlnuam khuaah July 16, 1968 khan Assam Riffles-in an kâp hlum a, Zawlnuam Vengpui High School bulah phûm a ni. Ruhro phawrh pualin Zawlnuam Vengpui YMA Hall-ah thlahna inkhawm buatsaih a ni.

MNYF chuan, ram tana nun hlan, hnam pasalṭhate ruang ruh hi MNF sorkar tirh aṭangin Martar Thlanmuala zalh tura lakkhawm turin ruahman a nih thu an tarlang a, "Hripuiin Mizoram a nuai avangin ruahmanna hi chak taka kalpui theih a ni lo a, hri léngin a ziaawm tâk avangin martarte ruangruh lak khawm hna thawh ṭan a ni," an ti.