Hmasawnna hna thawhin ram hmel a tidanglam mek - MNF

MNF party chuan thuchhuah siamin, mi ṭhenkhat leh political party ṭhenkhatin Mizo hnam leh ram ṭhatna reng reng an hmu thei lo niin an tarlang a, "Hmasawnna hna thawhin ram hmel a tidanglam mek zel hi a lawmawm kan ti," an ti.

MNF chuan, Keiṭum-Khawlailung inkara Tuichang lei dawh thar chu April 25, 2023-ah chief minister Zoramthanga'n a hawn thu te, April 25-ah vêk Power & Electricity minister R Lalzirliana'n Vankal Solar Park a hawn thu te, Mizoram sorkarin MGNREGS a kalpui dan a ṭhat avangin April 26, 2023 khan Puducherry RD minister AK Sai J Saravanan Kumar leh mi dangte'n Mizoram an rawn tlawh thu te, Mizoram sorkara minister zawng zawngin theihtawp an chhuah vek thute an tarlang a ni.

Tun hnaiah political party ṭhenkhatin sorkar kal tawh leh kal mekte’n hna an thawk lo ang leh Mizoram an sawp chhe vek angin an sawi nia sawiin MNF chuan, "An sawi hi a dik lohzia a lang zelah kan ngai. Hmasawnna thawk lo leh buaipui lo sorkar an awm ngai lo. Kum 40 chhunga ram lo hruai tawhte'n theihtawp chhuahin hma an la vek a, ngaih pawimawh leh thlûr bing erawh a inang vek lo," an ti.

MNF chuan, "Thuneihna lalṭhutthlenga ṭhut châk vanga kan ram hruaitute chak lo leh hmasawnna thlen lo anga an puhna hi thu belhchian dâwl lo a ni tih a lang zel dawn. Mi ṭhenkhat leh political party ṭhenkhatte’n kan hnam leh ram ṭhatna reng reng an hmu thei lo hi anmahni inenfiah an ngai hleah kan ngai," an ti a; Zoramthanga kaihhruai MNF sorkarin ram hmél a tidanglam mek niin an tarlang.